簡淑兒（Jessica）擁有一雙「腰果眼」，笑容甜美，被觀眾封為「宅男女神」，其實Jessica性格內向，如果當初沒有媽媽的「助攻」，她或許不會參加港姐而入行。
日前，Jessica接受《晴報》專訪，未入娛樂圈前，她在美國大學主修心理學，副修美術設計，及後在北京清華大學報讀半年工商管理進修的課程，回港後，Jessica選擇不再讀書，在2012年參加港姐，2015年加入女子組合「少女標本」，她說：「我喺2012年參加港姐，係因為媽咪，當時我喺北京讀緊書，媽咪知道我性格好怕羞，我係嗰啲連買快餐都會驚嘅人……其實我最唔鍾意係搭小巴要嗌落車，我係好驚好驚！每次搭小巴都好希望有人同我同站落車，咁我就唔使大嗌！因為我性格比較內向，同埋比較怕人，媽咪覺得我如果搵嘢做，呢啲性格會蝕底，咁就叫我去見識吓壯吓膽，同埋細個成日睇港姐，覺得港姐係好正面，學到嘢又識到人，所以我家姐就幫我報名。」
一笑渡凡間│菁兒對修緣因愛成恨黑化變妖魔 簡淑兒成功甩甜姐兒形象獲讚【下一頁】
性格內向的Jessica，竟然沒有抗拒媽媽的提議，反而選擇一試，她笑說：「因為我唔想留喺北京繼續讀工商管理，所以決定參加港姐，我唔會話係媽咪強迫我，正正係因為媽咪，我先有呢個勇氣。選港姐時，我都好驚，我好早都out咗嘞！好記得當時要學儀態、要學上台點樣講嘢，然後講多謝再落台；好記得導師同我講，『死得啦你！未上台已經腳震震，到時點上台呀？』我聽到好唔開心，因為真係唔係我在行嘅嘢，真係好驚，個人空白咗，到而家我諗返轉頭，上唔到台未必係一件壞事。」
Jessica認為參選港姐的過程，是人生中很重要的經歷，她說：「由一開始，我冇諗過入呢一行，到我選港姐入行，我又鍾意喎！後來我鍾意做主持，跟住唔知點解做做吓主持，又有人搵我組成『少女標本』！由細到大，我都冇諗過自己會做歌手唱歌，後來又有人搵我拍劇，而家諗起都覺得自己好好彩。」
Jessica指自己很容易緊張，面對不同挑戰、工作範疇，她愛上了演戲，「因為做主持、做歌手，大家都會留意我嘅一舉一動，而演戲嘅時候，大家都唔係望緊我，因為我係演緊另一個人，我就會冇咁在意身邊嘅人嘅目光；唔使演戲嗰陣，我會做運動、睇畫展去減壓，因為我好鍾意畫畫，總之唔使對住人做嘅嘢，我會輕鬆啲。」
Jessica坦言對住家人會自在一點，為免家人擔心，她選擇報喜不報憂，只有面對家姐才能暢所欲言，那男朋友麥大力呢？她笑說：「喺佢面前，我會比較小朋友，唔需要太硬淨咁堅強，可以做一個簡單啲嘅細路女，咁樣我已經覺得好幸福！相對佢要比較成熟，佢年紀比較大，會明白事理，可能大家都係喺外國長大，想法差唔多，好多嘢唔需要太去解釋。」認定麥大力為結婚對象？Jessica表示：「咁快去傾結婚呢個話題？我同佢一齊都係兩個月，咁早去講呢樣嘢都係一種壓力，順其自然啦！而家相處得開心，我覺得已經好好。」兩人因拍攝綜藝節目《SUPER FIVE》而認識，早前更一起去學潛水，6月被傳媒揭發戀情。
女神生日︳麥大力重操故業為簡淑兒首度慶生 模擬駕駛艙教揸飛機女友冧爆【下一頁】
Jessica最近在劇集《智能愛人》中，飾演兩個不同版本的智能機械人，當中包含多個造型，有秘書、侍應、看護等。要演繹這個角色，無論在對白還是動作上，對她均是一個挑戰，她點著頭說：「係呀！挑戰係講嘢同肢體動作上，例如我而家講嘢，會郁吓手，講嘢會有尾音，但做機械人，所有嘢都要好定，唔可以眨眼，講嘢要冇尾音，用詞又唔可以太過人性化……」
她提及有一場動作場面，擔心會破相，「拍呢齣劇嘅第一日嘅第一場戲就要被人爆樽！監製仲要落埋嚟同我講『唔好意思，第一日開工就要爆你樽』，仲要係連環爆！」她用手指著左邊面說：「我都有啲驚，因為比較近塊面，導演同我講，叫我試吓唔好眨眼……我真係好大壓力，拍之前就咗好多次位先至爆。」幸好Jessica做到如機械人一樣動也不動，可惜第二次爆樽時，還是刮損了左邊面，「我即刻影相畀經理人睇，話『點算？』，因為第一場戲之嘛！驚影響進度……好彩拍完休息咗幾日，等傷口痊癒再拍……其實我好驚，好驚有疤痕、發炎，夾硬補啲粉上去遮住，繼續拍，我好驚傷口會發炎。睇咗醫生，醫生話冇嘢，好快冇事。」
不少觀眾看過Jessica的演出後，都覺得她有點「膠面」，Jessica解釋是角色造型問題，她說：「我哋拍嘅時候都有研究過個妝，我面上嘅化妝，有一層『令」嘅嘢，仲有閃粉，成個感覺係機械感強烈一啲。」機械人角色的短髮，亦有段故，「自己平時唔會剪到咁短，因為呢齣劇呢個角色而去剪，剪到『一葺一葺』咁，增加機械感，當時我出街都會戴帽。」同時指每次化妝都需要花三小時，辛苦程度跟拍古裝片無異。
服裝：Lounge pink
攝影：何家賢
撰文：黃曉妍
U Lifestyle App自家節目登錄《U TV》專區！
↓↓試玩、試食、試用影片任您睇↓↓
【立即體驗】