【聲明】港生活網站並無進行電話推廣活動

《聲夢》開騷壓力大 炎明熹自爆飽受失眠困擾

發佈時間: 2021/08/17

《聲夢傳奇》15位學員的一連四場演唱會前晚圓滿結束,炎明熹(Gigi)、姚焯菲(Chantel)及鍾柔美(Yumi)等一眾學員落力演出,不過Gigi自評表現僅僅合格,只得16歲的她更因壓力太大導致失眠,又笑言演唱會完結後要趕工做暑期功課。

炎明熹與鍾柔美前晚分別與導師衛蘭合作,Yumi在台上搞笑爆料,指平日學員多數以英文短訊與衛蘭溝通,唯獨Gigi的短訊讓衛蘭「睇唔明」,Gigi坦言因不擅長說話加上英文麻麻,所以要靠繙譯,Yumi笑說:「果然火星文得Gigi先睇得明。」

何晉樂公開向女友示愛

Gigi完騷後受訪,表示唱足四場令她幾乎失聲,又自爆由比賽完結到開騷前,一直備受失眠問題困擾:「就嚟演唱會就覺得『死啦』,諗咗好多方法都瞓唔到,每朝姑丈拉我去跑步練氣。」她自評表現只得50、60分:「總括嚟講表現有少少失誤,不過尾場畀多五分,因為同觀眾多咗交流。」失眠與入行壓力大有關?她笑說︰「我都唔知壓力嚟自邊度,可能太多嘢諗,每晚一瞓就有好多音樂喺腦海游嚟游去,不過最近屋企人買咗補健品畀我食。」她笑言完騷後最想回家休息,接着便要為準備拍新劇《青春本我》,以及趕做暑期功課:「功課未做晒,但暑假已經所餘無幾,要加快速度完成。」

另外,學員何晉樂(Rock)早前在《聲夢》決賽唱《天黑黑》表現失準,他前晚拖住導師李幸倪(Gin Lee)的玉手再度合唱此曲,成功一雪前恥,他們更感動得流下開心淚水。Rock表示比賽落敗後,Gin Lee特意致電講足兩個鐘鼓勵他;他亦乘機公開答謝台下的女友:「比賽期間,我女朋友好支持我,佢為人比較低調,但好多謝佢咁包容我,I love you baby!」Rock事後表示女友在場睇騷,他想在台上鄭重多謝女友:「浪漫啲嘛!佢喺背後幫咗我好多,佢會遷就我比賽,又煲湯畀我飲。」

撰文:Pauline

美術:梁政敏

《聲夢》開騷壓力大 炎明熹自爆飽受失眠困擾

(左起)姚焯菲、鍾柔美、詹天文及炎明熹跳唱時大曬長腿。

《聲夢》開騷壓力大 炎明熹自爆飽受失眠困擾

何晉樂拖實Gin Lee合唱,笑言台下女友夠大方不會呷醋。