【聲明】港生活網站並無進行電話推廣活動

簡淑兒 怕醜小花成長記

發佈時間: 2021/08/20

擁有一雙招牌「腰果眼」的簡淑兒(Jessica)笑容甜美,被觀眾封為「宅男女神」,雖然從事幕前工作,但原來Jessica性格極度內向,連搭小巴嗌落車也不敢,若非簡媽媽當年為她報名選港姐「練膽量」,她也不會因此入行,亦認識不到男友麥大力。

外形甜到漏的簡淑兒,在美國讀大學時主修心理學、副修美術設計,及後在北京清華大學報讀半年工商管理課程。Jessica因極怕陌生人,加入娛樂圈全是無心插柳。「我2012年去選港姐,完全因為媽咪。當時我喺北京讀書,媽咪知道我性格好怕醜,覺得我將來工作會有啲蝕底,所以想我去見識下壯下膽,就叫我家姐幫我報名(選美)。」

搭小巴不敢嗌落車

過往的Jessica原來宅得驚人,「我係嗰種買快餐都會驚嘅人,其實我最唔鍾意搭小巴要嗌落車,真係好驚好驚,每次搭小巴,我都好希望有人會同一個站落車,咁我就唔使大嗌『有落』。」不過她當時竟沒有抗拒媽媽的提議,決心回港選美,「當時我唔想留喺北京讀書,所以我唔會話媽咪迫我選港姐,而係因為佢,我先有勇氣。」但她選美期間怕醜依然,「我好早已經out咗(落選),我記得當時要學上台點講嘢,然後講『多謝』再落台。我好記得導師同我講『死得啦,你未上台已經腳震震,到時點上台呀?』我聽到好唔開心,因為真係唔係我在行嘅嘢,我真係好驚,應該成個人空白咗,依家諗番,上唔到台都未必係一件壞事。」

Jessica認為參選港姐是人生中很重要的經歷,「由一開始,我無諗過入呢一行,到我選完港姐入行,我又鍾意喎;後來唔知點解做做下主持,又有人搵我加入組合『少女標本』,其實我都無諗過自己會做歌手唱歌;後來又有人搵我拍劇,我諗番起都覺得好好彩。」她自言是「緊張大師」,在主持、歌手及演員三個身份之間,她尤其喜歡演戲,「因為做主持或者歌手,大家都會留意我嘅一舉一動;但係演戲嘅時候,大家都唔係望緊我,因為我係演緊嘅係另一個人。」

與麥大力拍拖感幸福

工作以外,Jessica的減壓方式包括做運動、欣賞畫展等,「因為我好鍾意畫畫,做啲唔係對住人嘅嘢,我會輕鬆啲。」入行多年,Jessica雖然已比以前外向,但始終和家人一起,才是最自在。談到因合作拍節目而結緣的男友麥大力,Jessica笑說︰「喺佢面前,我會比較小朋友,唔需要太硬淨、堅強,可以做番一個簡單啲嘅細路女,咁樣我已經覺得好幸福。佢比較成熟啲,年紀比較大,會明白事理,好多嘢唔需要解釋,加上大家都喺外國長大,想法都差唔多。」認定男友是結婚對象?「我哋未必咁快去傾結婚話題,因為我哋一齊都只係兩個月,咁早去講呢樣嘢都係壓力,順其自然啦,依家相處開心,我已經覺得好好。」

為「膠面」演出解畫

最近,Jessica在劇集《智能愛人》中飾演兩個不同版本的智能機械人,她笑言甚有挑戰性,「主要嘅挑戰係講嘢同肢體動作,正常講嘢我會郁下手,又會有尾音;但演機械人時,所有動作都要好定,唔可以眨眼,講嘢無尾音,用詞唔可以太過人性化,所以比較難。」她在劇中挑戰侍應、看護等不同造型,「開工第一日就要被人爆樽,因為爆樽時好近塊面,導演仲叫我試下唔好眨眼,好大壓力。」結果她被刮損左邊面,令她十分擔心,「因為當時仲未拍完,夾硬補啲粉遮住,我好驚傷口發炎同留疤,好彩好快無事。」不少觀眾看過Jessica的演出後,都覺得她有點「膠面」,Jessica解釋︰「其實我哋想角色外形嘅機械感重啲,所以我塊面打咗一層『令』嘅嘢上去,仲有閃粉,每次化粧要三個鐘,同拍古裝劇差唔多。」

服裝︰Lounge Pink

撰文:黃曉妍

攝影:何家賢

美術:梁政敏

一按睇片

簡淑兒 怕醜小花成長記

2012年,Jessica鼓起勇氣選港姐,可惜20強不入。(資料圖片)

簡淑兒 怕醜小花成長記

Jessica與麥大力(左)因合作拍綜藝節目《SUPER FIVE》撻着。(IG圖片)

簡淑兒 怕醜小花成長記

Jessica在《智能愛人》中飾演機械人,最困難是不能眨眼,講對白不能帶感情。(網上截圖)

簡淑兒 怕醜小花成長記

Jessica甜笑時展現一雙「腰果眼」,因而獲封宅男女神。(IG圖片)

簡淑兒 怕醜小花成長記

Jessica平日做運動減壓,更操出結實腹肌。(IG圖片)

簡淑兒 怕醜小花成長記

Jessica早前在《一笑渡凡間》中因愛成恨化身成女妖,表現獲觀眾讚賞。