被批「靠父蔭」 關楓馨︰畀驚喜觀眾啫

《香港小姐競選2021》12位決賽佳麗昨早出席記者會，對於不少網民批評④關楓馨在準決賽的才藝表演上，獲爸爸關禮傑上台助陣，最終成功入圍的關楓馨解釋道︰「爸爸唔係幫手，琴都係我自己彈，之前同同組佳麗討論過，決定畀少少驚喜觀眾啫…每個人睇嘢都唔同，實有人鍾意、唔鍾意，我哋會汲取教訓，下次知點樣做得更好。」

問到出身選美世家的⑧宋宛穎會否效法關楓馨，在總決賽找來曾奪澳門小姐亞軍的媽媽文寶雪撑場？她表示︰「媽咪噚晚（前晚）喺電視機前支持我，佢唔鍾意出鏡，但希望佢總決賽現身支持下。」問宋宛穎認為關楓馨出動「星爸」，會否對其他佳麗不公平？她指各組表演不同，當中不存在偏頗。大熱的③陳聖瑜同樣認為沒有不公：「紅組（關楓馨組別）需要幫手，搵爸爸係唔錯嘅選擇。」

另外，「粗口港姐」①梁允瑜前晚首輪被淘汰，她直認非常失望︰「我覺得自己輸在太多負面新聞、太真同敢言，今次嘅賽制唔係好適合我。」問她可有後悔拍粗口片？她說︰「當時男朋友爆我屋企嘅醜聞，我真係好唔開心，亦都有諗過自殺，被分手係處於唔開心嘅狀態，有情緒發洩都好正常…但我依家可以做番自己，可以講正宗嘅廣東話同食魚蛋，唔使再避忌。（之後有咩打算？）會去一次短旅行，出年會讀碩士。（如果TVB想簽你？）再講啦！」

採訪︰Pauline

攝影（部分）︰林良明