【聲明】港生活網站並無進行電話推廣活動

拍《怒火》獨鬥十幾人 58歲黃德斌自信好打得

發佈時間: 2021/08/24

黃德斌、吳浩康及楊天宇在電影《怒火》中飾演幹探,與謝霆鋒等一班悍匪有連場激鬥,其中德斌在南亞村一個打十幾個的「個人表演」亦令觀眾印象深刻,德斌憶述拍完該場「肉搏」戲後氣喘連連,但一向有運動底子的他仍霸氣說︰「嚟多take都仲得!」

在戲中飾演重案組警署警長的黃德斌,日前聯同「下屬」吳浩康及楊天宇一同接受訪問。德斌坦言最難忘戲中拍攝南亞村打鬥及尖沙咀鬧市槍戰兩幕,「今次嘅動作戲好火爆,因為有甄子丹做動作指導,又有謝霆鋒等咁多個高手喺度,成個場面更加壯觀。」為求效果更逼真,三人拍攝前特別以真槍實彈作訓練,熟習不同槍械、練習換子彈及揸槍姿勢等,不過德斌直言拳腳打鬥最令他難忘。「南亞村呢場戲對我嚟講好特別,因為好多個人圍攻我一個,我揸住支槍同十幾個人肉搏,最尾仲要將對方成個人舉起再撻低,好似好勁咁。子丹睇完之後問導演(陳木勝)使唔使較快啲鏡頭,導演話『唔使,德斌都夠快,可以拍下一個鏡頭』,可能佢覺得我係咁上下,但其實我可以嚟多個take㗎!」楊天宇在旁表示︰「我諗導演唔捨得德斌嚟多次,睇到佢嗰幕係好辛苦。」

大讚陳木勝細心

《怒火》是陳木勝導演的遺作,合作過的演員無不大讚這位人品極好的導演。德斌透露自己首部與陳木勝合作的電影是92年的《嘩!英雄》,後來再與對方合作《男兒本色》和《雙雄》等多部電影,彼此合作無間,特別有感情,「我拍咗導演好多部電影,可能因為咁,我先可以喺其他電影中出現,佢對我嚟講係一個好重要嘅導演;佢除咗好擅長拍動作片,佢好多作品中都有唔同嘅情,無論親情、友情或愛情,所以佢係一個好重情嘅人。」

德斌大讚陳木勝極為細心,「佢真係好仔細,就算連我點呼吸都睇到,佢會話咁樣無咁好睇,教我應該點樣呼吸。佢連咁細微嘅地方都觀察到,然後好直接話畀你聽,但唔會令你唔舒服,係一位好仔細嘅導演。」至於吳浩康則表示第一次跟陳木勝導演合作的是《新警察故事》,今次第二度合作,「再見番陳導演,覺得佢處事好有風度、好有正義感,佢對人好真情,而且佢有好多板斧,睇到佢好叻,片場對住咁多人、咁多事,但真係無一刻見佢𤷪𤺧,佢EQ好高。」

唔介意再咀男人

另外,德斌在劇集《大叔的愛》中飾演HeHe大叔KK而人氣急升,問他喜歡扮大叔還是拍攝動作片?他笑言︰「樣樣都得,我係一個演員,做演員乜都要試。(寧願拍打戲定同男人拍咀戲?)吓,都係打啫,都係動作片呀。(《大叔》開拍電影版?)未聽聞,要睇版權同故事點發展,就算買咗版權,故事都要日本審批。(開電影版仲咀唔咀?)睇下劇本點啦!」吳浩康和楊天宇亦揚言不介意男男咀戲,楊天宇更笑說︰「咀德斌梗係好啦。」

黃德斌

髮型︰Vince Pang @IL COLPO group

化粧︰Yen Lai

服裝︰shoes by On Running

場地︰The Crown@英皇駿景酒店

吳浩康

髮型︰Moe @ IL COLPO(On Lan Street, Central)

化粧︰木子維納Vena

楊天宇

髮型︰Ritz Lam

化粧︰Vena

服裝︰Sandro Homme

採訪︰倪小珊

攝影︰林良明

美術︰梁政敏

拍《怒火》獨鬥十幾人 58歲黃德斌自信好打得

(左起)吳浩康、黃德斌及楊天宇拍攝《怒火》時難免受傷,但幸無大礙。

拍《怒火》獨鬥十幾人 58歲黃德斌自信好打得

甄子丹與黃德斌在戲中帶領一班下屬,在南亞村跟悍匪激鬥後傷痕累累。

拍《怒火》獨鬥十幾人 58歲黃德斌自信好打得

《怒火》有不少鬧市追逐及槍戰,令劇情更加緊張刺激。

拍《怒火》獨鬥十幾人 58歲黃德斌自信好打得

黃德斌在《大叔的愛》中對「田田」呂爵安情深一片,演出大獲觀眾讚賞。(網上截圖)