【聲明】港生活網站並無進行電話推廣活動

ViuTV《七救星》狂吸25萬觀眾 七仙羽變萬人迷︰出街唔敢唔化粧

發佈時間: 2021/08/25

風水師傅七仙羽(七師傅)主持的ViuTV搞笑節目《七救星》上周一晚上11時開播後,在網絡瘋狂洗版,首周平均收視錄得3.8點(約25萬觀眾),成為上周ViuTV收視冠軍。昨日七師傅接受《晴報》訪問時,表示暫未考慮開拍第二輯︰「依家太多job唔夠瞓,加上再開(第二輯)要有創意、有新嘢,否則弄巧反拙!」

七仙羽今次為《七救星》犧牲不少,除了扮學生妹及唐三藏,她在第五集為練美娟(娟姐)解決前世孽緣,穿上婚紗大玩離婚後再婚;前晚第六集,七師傅又跟男團P1X3L跳勁舞,非常投入。玩嘢以外,七師傅在第二集為幫杜如風戒甩購物癮,迫杜如風捐名牌手袋出售,再帶隊到深水埗做義工派物資,充滿教育意義。七師傅的主持風格搞鬼過癮,獲網民狂推「師傅唔紅,天理不容」。節目首周收視亦於前晚公布,《七救星》錄得3.8點收視(約25萬人收看),力壓許廷鏗主持《AH佛真‧惜玩》的3.5點收視,成為ViuTV上周收視之冠,認真可喜可賀。

派錢給藝人雪中送炭

昨日七師傅受訪時,直言不理解收視計算方法︰「我都唔知收視點計,其實好唔公平,好多人上網睇又無計,自己見好多人喺FB留言同分享。(期望本周收視再創新高?)順其自然,最希望帶畀大家歡樂,送畀大家正能量!」談到其主持風格受觀眾熱捧,七師傅笑言︰「大部分主持講嘢都係背稿,我就自然啲,諗到乜就講乜,比較真實!」網民跪求七師傅再跟杜如風合作,七師傅搞笑說:「啲人話同我一齊,佢就正常番,不過拍節目要花幾個月時間,要睇ViuTV安排。」提到《七救星》會否開拍第二輯,她坦言由今年二月至今已忙足半年,不想太快添食:「拍得太多觀眾會悶,第二輯要勁過第一輯,要有創意、有新嘢畀觀眾,否則弄巧反拙。(為節目倒貼派物資?)我無乜所謂,自己除咗請人食飯,手袋長期都有利是,見到啲藝人無工開好慘都會派,有啲工作人員做得辛苦人工少都會派!」

直認年輕粉絲急增

七師傅透露近期增添不少年輕粉絲︰「以前搵我算命、問字,都係高消費力大客,依家多咗無乜消費力嘅年輕人搵我問字,好多後生fans!」成功吸納老中青粉絲,她坦言︰「其實有利有弊,呢排我去主要招待外國人嘅會所,都有好多人認得我,依家唔化粧唔敢出街,好唔方便,太多job又唔夠瞓!」另一方面,近日無綫翡翠台收視亦見回升,重頭劇《七公主》錄得20.8點收視(約136萬觀眾),《智能愛人》平均收視亦有17.9點(約117萬觀眾);剛過去周日直播的《We Miss Hong Kong香港小姐競選準決賽》,最高獲19.9點(約130萬觀眾)。

撰文︰Steven

美術︰梁政敏

ViuTV《七救星》狂吸25萬觀眾 七仙羽變萬人迷︰出街唔敢唔化粧

七師傅變身學生妹冧娟姐,網民笑到噴飯。(網上截圖)

ViuTV《七救星》狂吸25萬觀眾 七仙羽變萬人迷︰出街唔敢唔化粧

日前七師傅自掏腰包請節目一眾嘉賓歎火鍋,提早慶功。(FB圖片)

ViuTV《七救星》狂吸25萬觀眾 七仙羽變萬人迷︰出街唔敢唔化粧

七師傅化身「唐七藏」為節目獻唱《Only You》,用笑聲打救世人。(網上截圖)

ViuTV《七救星》狂吸25萬觀眾 七仙羽變萬人迷︰出街唔敢唔化粧

七師傅跟P1X3L三位小鮮肉在天台狂舞,寓意眾人事業步步高升。(網上截圖)

ViuTV《七救星》狂吸25萬觀眾 七仙羽變萬人迷︰出街唔敢唔化粧

七師傅帶杜如風在街頭派物資,愛心爆棚。(網上截圖)

ViuTV《七救星》狂吸25萬觀眾 七仙羽變萬人迷︰出街唔敢唔化粧

七師傅與193胞妹郭嘉盈(左)合作拍廣告。(IG圖片)