自認酒量淺 湯洛雯唔怕馬明酒後亂性

湯洛雯（靚湯）和男友馬國明最近分別拍攝新劇《OPM》及《隱形戰隊》，兩人不約而同在劇中有激烈床戲，不過靚湯表示他們互相信任，而且電視尺度有限。靚湯又笑言自己與男友的酒量同樣淺，不擔心對方會酒後亂性。

湯洛雯和名廚兼烹飪節目主持人黃亞保昨日出席活動，期間靚湯挑戰廣東海鮮擺盤技巧，並向觀眾介紹日本清酒。問她平日是否喜歡飲酒？靚湯表示︰「通常食飯嘅時候會飲少少清酒或者柚子酒，鍾意飲細細杯，紅酒太大杯反而唔太鍾意。（馬明酒量如何？）佢都唔太飲得，不過有時食西餐會飲少少，打邊爐就唔會飲酒。」

靚湯指自己與男友的酒量都不太好，她笑言︰「我都試過飲醉酒，但唔會發癲，通常都係面紅紅同埋周身痕。幾年前我同高海寧去日本旅行，我哋兩個都唔係好飲得，有晚飲完酒就攬住大家，喊晒咁講心事。（提醒男友唔好酒後亂性？）佢唔會飲酒，仲叫我都唔好飲，因為要揸車，所以唔驚『亂性』。」

挑戰隆胸角色

提到馬明近日拍攝新劇《隱形戰隊》，劇中與唐詩詠有激烈床戲，靚湯不甘示弱說︰「我都有啦！喺新劇《OPM》同黃嘉樂有親熱戲，睇劇本都覺得幾激。」不過，靚湯指自己和男友都認為電視劇的尺度有限，而且兩人拍親熱戲前都會通知對方以示尊重，所以彼此十分信任。靚湯又透露在新劇中會飾演隆胸角色，當中不乏大膽的谷胸鏡頭，自言只敢露背的靚湯希望能盡量克服尷尬。

另外，早前靚湯的愛貓離世，她表示心情已逐漸平復，而自己目前仍有養兩隻貓及一隻狗，至於會否再養新寵物，就要視乎緣份。

採訪︰Pauline

美術︰梁政敏