【聲明】港生活網站並無進行電話推廣活動

吳業坤 幸運是我

發佈時間: 2021/08/27

31歲的吳業坤(坤哥)轉眼入行十年,曾兩度踏上紅館舞台開個唱,亦試過陷入事業低谷,經常做網民箭靶。這位「巨聲二幫」出身的歌手,感恩經歷了事業高低起伏,早前赴日本享受工作假期,又好學不倦裝備自己,發掘演藝事業以外的興趣。「我不斷思考人生,完成兒時夢想(紅館騷),依家無太大爭勝心,因為已經滿足!」。

11年參加《超級巨聲2》加入娛樂圈的坤哥,雖然外形未算俊朗,但因口甜舌滑而桃花旺盛,緋聞情人包括龔嘉欣、王卓淇等女神,獲封「偽毒坤」。不過,年紀漸長的坤哥近年感情生活回歸平淡,去年尾更暫停娛樂圈工作,毅然在日本逗留半年享受工作假期,花了18日從京都徒步到東京,完成全程長達492公里的「東海道五十三次」,為這段工作假期留下「小句號」。坤哥亦在IG全程直擊,與網友分享在彼邦面對的逆境及難關。

闖東瀛夢碎無怨言

原來坤哥曾有望在日本出道做歌手,卻因新冠肺炎疫情令這千載難逢的機會付諸流水。「我鍾情日本文化,其實一路以嚟都有同日本嘅藝能公司傾合作,但因為新冠肺炎爆發,所有計劃都停晒。」坤哥曾主持J2娛樂新聞節目,其後曾擔任《勁歌金曲》主持,在剛過去的東京奧運,坤哥更代表TVB到當地採訪。「其實喺日本嘅工作假期幫助好大,我已經識用日語基本溝通,學以致用。」坤哥與周奕瑋主持《東京五輪直送》,介紹奧運期間的周邊事物,可惜訪問賽艇運動員洪詠甄時被指態度輕佻,事後坤哥發文謝罪,自認「不專業」及「失言」,又已私信對方道歉,相信他已經一事、長一智。

受麥明詩轉行啟發

年過三十,坤哥對人生有更多規劃,透露今年極大機會重返校園,供讀遙距學位課程,「如果真係報讀成功,可能會調節生活及工作方式。」他坦言,以往不敢向公司提出進修一事,但年紀漸長,覺得要好好裝備自己;同時他亦受好友麥明詩(Louisa)前年轉行所啟發,「Louisa一向敢言,我都好欣賞佢話做就做嘅決心,我哋聚會時都會講未來,啟發我諗多啲。」坤哥不甘安於現狀,近來先後考獲潛水牌、空手道黃帶及完成激光矯視手術,「我去到呢個年紀乜都想試,希望喺有限時間學多啲嘢。」

慶幸早入行機會多

五年前的坤哥曾經在樂壇呼風喚雨,連續兩年贏得商台「叱咤樂壇我最喜愛的男歌手」,亦成功登陸紅館開騷。經歷過事業高峰,坤哥現已回歸平淡,加上近年樂壇人才輩出,新生代如ViuTV男團MIRROR、「聲夢小花」炎明熹、姚焯菲(Chantel)等冒起,坤哥坦言自己入行時機剛好。「十幾年前我參加亞視《亞洲星光大道》入唔到圍,之後輾轉參加咗《超級巨聲2》先至成功。如果我依家先出道,咁大競爭下要爆出係難上加難!好多嘢都係命運安排。」他感恩自己把握機會,完成開紅館騷夢想,「當時個個都話唔做就無得再做,我都覺得梗係開咗先算,好彩完成咗夢想!」他直認現時對事業沒有太大野心,全因曾踏上紅館已心滿意足,很多事情也不會強求。

提及MIRROR成功改變現在的樂壇生態,坤哥亦從中學習。「我都有留意MIRROR嘅嘢,我表姐都好鍾意佢哋,香港以前無呢種追星文化,突然爆得咁犀利,希望可以『造大個餅』,等多啲人留意香港樂壇都係好事。」至於無綫《聲夢傳奇》一班小妹妹,坤哥相信她們為樂壇帶來新氣象,對Chantel更是另眼相看︰「我好似佢uncle咁,我同朋友講希望日後有個咁嘅囡囡,難得佢咁pure,雖然好多人話我好似變態佬咁pm(私訊)佢,但係大家都應該明白我當係佢妹妹一樣。」

攝影︰林良明

撰文︰Steven

美術︰顏玉玲

吳業坤 幸運是我

坤哥在日本工作假期感受到地道文化,令他學懂慢活。(IG圖片)

吳業坤 幸運是我

麥明詩的敢作敢為,令坤哥非常欣賞。(FB圖片)

吳業坤 幸運是我

坤哥(右一)以輕鬆手法採訪東京奧運,卻意外造成公關災難。(IG圖片)

吳業坤 幸運是我

坤哥曾兩奪商台我最喜愛的男歌手,更在紅館開騷,人氣一時無兩。(資料圖片)

吳業坤 幸運是我

坤哥(左)在美女潛水教練葉梓敏輔助下學懂潛水,成就解鎖。(IG圖片)

吳業坤 幸運是我

坤哥15年在《勁歌》頒獎禮唱到眼鏡起霧一幕,成觀眾集體回憶。(資料圖片)