無綫小花鄺潔楹（Judy）被宅男追捧為「哈比女神」，雖然「哈比」兩個字有點嘲笑的意思，但Judy一於少理，覺得自己的身高，反而會吸引另一種工作的機會。
早前，Judy接受《晴報》專訪，提到未入行前，正職是業務分析師，副業是平面模特兒，身高只有155CM的她，坦言會較其他模特兒輸蝕，「真係以為係騙案！當時老闆同我講『我覺得你有潛質，你個樣又幾甜嘅，啲客會鍾意你呢類型，食嘢會好enjoy』，當時影平面廣告相，齋見到個頭，唔覺得我係咁矮，咁我又覺得冇傷害，仲可以賺多份外快，正職嗰邊話如果我唔係太過高調，佢哋都ok！」嘗過幕前工作後，有一次她與娛樂新聞台的監製見面，對方要求她先練好廣東話、咬字、望鏡頭技巧等等，Judy決定捨棄沉悶的正職，去做主播，待時機成熟就調她去主持旅遊節目《3日2夜》。
《愛回家》拜金Venus｜「哈比女神」鄺潔楹爆進化黑歷史 被哥哥質疑：覺得我係整過容【下一頁】
對於網民封她做「哈比女神」，Judy覺得「哈比」兩字有點貶義，但沒有感到不快，大方承認自己個子小，反而驚訝自己獲封為女神，她對「哈比」亦有另一番見解，「其實會帶畀我一啲工作機會，之前有啲客戶搵我，係sell最細部嘅手提電腦，咁就搵咗我！同埋有啲韓劇係sell女主角細細粒，男主角好高大，女主角發生啲乜嘢事，男主角一嘢就攬住佢！呢啲情景係好sweet，我都好希望拍到一齣愛情劇，可以做呢啲被保護嘅女主角……拍嘢嗰陣，我都唔好意思成日要男拍檔擘大對大腿嚟遷就我（高度），因為都好攰嘅！」
愛回家│潮偉請Venus做助手釀片場災難 鄺潔楹曬與194cm袁文傑搞笑合照【下一頁】
Judy在劇集《七公主》中飾演任職見習事務律師方楚瑜，其興趣是劍擊，玩重劍。在拍攝前，身形矮小的Judy一度懷疑自己能否勝任這個角色，她說：「劍擊教練教咗我一啲好難嘅動作，係世界冠軍先做到，自己當時眼都凸埋！嗰啲動作……我學咗三個禮拜都未有起色。我無啦啦去學劍擊，學到基本步已經算係咁。我學咗4個幾月，要做世界冠軍嘅動作，冇可能㗎喎！仲記得得番一個禮拜時間，我教練有少少想放棄，佢話不如同監製（陳維冠）講搵定替身，我聽到係有啲唔憤氣，因為我覺得好唔型囉！可能我有少少好勝！我最後強迫自己，好似運動員嘅堅持，冇嘢係唔得嘅嗰種精神，嗰個禮拜死練爛練，試過開廠拍嘢到（早上）7點，跟住返屋企沖涼、瞓覺，瞓兩、三個鐘，10點起身去練劍……最後真係畀我做到所有動作！劇中嗰場比賽拍咗8個鐘，聽聞剪出嚟只係得3分幾鐘，我哋真係拍得好辛苦。」
她笑言去年知道要在《七公主》扮演業餘劍擊運動員時，腦海中充滿了黑人問號，「原來（監製陳維冠）問咗教練嘅專業意見，手短腳短嘅人唔一定輸蝕，好似今年奧運重劍男子組金牌冠軍都係比銀牌嗰位細粒嘅。監製喺去年留意到香港女子劍擊運動員江旻憓，佢係劍擊界一姐，好欣賞呢個運動員，而且佢有好朋友都係玩重劍嘅，所以開劇就順勢加埋劍擊元素落去！同張家朗嘅花劍唔同，花劍、重劍兩者重量差唔多，步法有啲相似，但規矩上有唔同。」
《七公主》首播｜黃翠如病態體重演酷爆刻薄大狀 食正劍擊熱潮望挽救收視低潮？【下一頁】
Judy透露學劍擊期間，教練替她報名參加男女混合比賽，汲取實戰經驗。至於會否繼續學劍？Judy笑說：「我諗唔會長時間咁學，因為會令到大腿好粗，我個人比較細粒，我想身型修長啲呀！玩劍擊嘅運動員，佢哋嘅下盤會比較粗壯，腳嘅肌肉量要好大，去應付突然之間嘅爆發力；我冇見過呢類運動員對腳係幼，所以對女仔嚟講犧牲都幾大！」坦言「恨」跟港隊劍擊運動員切磋的她，之前在一間劍社入面拍攝時，得知港隊其中一位運動員張小倫經常在這裡練習，「唔知佢有冇幫我哋客串過一場呢？因為戴咗頭盔都唔知打邊個，哈哈！我都想有機會較量吓，始終呢個機會好難得，但我玩重劍，佢玩花劍，可唔可以就我玩重劍呢？」
曾在美國路易斯安那州就讀高中的Judy，當時寄宿於一個黑人家庭裡，「2008年美國金融風暴，2009年我過去讀書，變咗好多家庭都冇乜經濟能力，淨係得嗰個黑人家庭肯收留我，同佢哋住一年，多一個人就多一份支出……我好開心佢哋揀咗我！其實嗰年我經歷嘅嘢，好多人都經歷唔到㗎，例如我參加田徑隊，我係同黑人跑步，同黑人鬥！而家諗番起，都唔知自己點解咁有勇氣去報田徑隊，始終黑人嘅運動基因比亞洲人好！我記得跑3,600米長跑，跑第一嗰個人，快到可以陪我跑多兩個圈，喺側邊幫我打氣都仲得！」
野外步出│鄺潔楹豪氣揚言包起近萬元拍攝費 自爆同黑人Rapper拍拖迷戀才華【下一頁】
由於Judy在學校裡是唯一一個亞洲人，由於害怕自己被欺負，竟然講了一個大話，至今仍有同學相信，她笑說：「唔知邊度嚟嘅靈感，為咗保護自己，我同佢哋（同學）講我uncle係Jackie Chan（成龍），因為除咗Bruce Lee （李小龍），佢哋覺得Jackie Chan好打得，而且好受歡迎，於是我都變得好受歡迎！」29歲的Judy仍有跟高中同學聯絡，續說：「問我幾時寄簽名相畀佢哋……我先發現原來咁多年，佢哋仲信我嘅uncle係Jackie Chan，而且佢哋喺我Facebook 知道我做咗藝人，就會問係咪uncle帶我入行，哈哈！原來呢個謊言係唔停得㗎！希望有日遇到成龍大哥，我會問佢攞簽名相……呃咗人哋咁多年都有少少唔好意思。」
化妝：King Yip
髮型：Terrence Chan @ hair
服裝：tout a coup
攝影：黃敬博、黃紫維
撰文：黃曉妍
U Lifestyle App自家節目登錄《U TV》專區！
↓↓試玩、試食、試用影片任您睇↓↓
【立即體驗】