【聲明】港生活網站並無進行電話推廣活動

樂壇新人輩出 泳兒無懼威脅︰多啲人先好玩

發佈時間: 2021/09/01

泳兒近日忙於宣傳新歌《荊棘海》,出道15年的她,無論在事業或家庭上都遇過不少荊棘,幸好她性格堅強樂觀,總能迎刃而解。早前,泳兒應邀為《聲夢傳奇》擔任導師,過程中與一眾學員培養出深厚情誼,面對這班樂壇新星,她從來不覺得受到威脅。

泳兒繼「花朵」及「溝渠」的暗黑歌曲系列後,最近推出「海洋」系列的第一部曲《荊棘海》,當中充滿暗黑風格的MV,表達出面對荊棘時的傷痛,同時亦令泳兒回帶過去的經歷。「三月時我第一隻狗狗走咗,呢啲傷痛需要啲時間沖淡;加上自己失聲,同埋媽咪身體有問題,呢啲對我來講都係好大打擊。至於失敗方面,就係我出道時好多嘢好順利,但去到一個樽頸位,外界對我好多作品都反應唔好,甚至無反應,嗰排係令我成長得最快,亦係跌得最痛嘅一次,我就將呢啲痛楚化為力量,唱入隻歌裏面。」

逞強只會更傷心

幸好遇到問題時,泳兒沒有自暴自棄,「我比較堅強,會想辦法搵出路畀自己,唔開心嘅情緒一定有,想匿埋都一定有,但我覺得先要接受呢樣嘢,唔好去逃避,明明自己唔開心,但永遠都逞強,只會更加唔開心,所以要學習去面對,先可以治療心裏嘅傷痛。」雖說老生常談,但泳兒指哭出來是最直接的發洩,「我會同朋友或者男朋友傾訴,以前覺得喺人哋面前喊,好似好羞恥咁,被人見到脆弱一面,但依家我想喊就會喊,唔會匿埋。男朋友都會𠱁我,佢會叫我出街或食嘢,分散我注意力。」

羨慕新生代做自己

泳兒早前擔任無綫歌唱選秀節目《聲夢傳奇》的導師,她坦言最初都感到壓力,「我驚自己唔識教學員,或者驚佢哋聽唔明我講乜,始終識唱歌,唔代表你識得教,而且同一班十幾歲嘅小朋友相處,我驚有代溝,哈哈!」泳兒大讚愛徒鍾柔美(Yumi)吸收能力強,「只要同Yumi講兩次,有時淨係WhatsApp同佢講,佢好快就知我想講咩,跟住佢就做到出嚟。依家啲小朋友應變能力好快,十幾歲人仔上到台壓力好大,20幾個專業評審圍住你,畀分又評論,唔係咁簡單,所以學員嘅抗壓能力、吸收能力同應對能力都好強,比我更加好。」

泳兒坦言初入行時經常一臉迷茫,公司安排她做甚麼便做甚麼,眼見時下的新人可以自由自做自己,令她十分羡慕。「以前嘅我會覺得做歌手唔可以答錯嘢,唔可以將最真實一面畀大家見到;但依家唔同,新人完全係做番自己,鍾意講咩就講咩。但咁樣當然有危機,有時都驚佢哋會講錯嘢。」歌唱選秀節目新人輩出,個個實力非凡,問泳兒可感到威脅?她說︰「咁又唔會喎,其實永遠都有新人出現,反而佢哋叻啲,令到我哋都要同步、要進步;但唔係一個威脅,如果視為一個威脅,我覺得眼光太狹窄,樂壇應該要多啲唔同嘅人,大家有唔同嘅實力先至好玩。」

化粧︰King Yip @KINGS MAKEUP

髮型︰Zivyeunghair@leonardo3

服裝︰Amelie Street

場地︰Coffeelin

撰文︰倪小珊

攝影︰林良明

美術︰梁政敏

樂壇新人輩出 泳兒無懼威脅︰多啲人先好玩

《荊棘海》的MV充滿電影感,令泳兒開始對演戲產生興趣。

樂壇新人輩出 泳兒無懼威脅︰多啲人先好玩

泳兒對《聲夢傳奇》兩位愛徒冼靖峰和鍾柔美愛護有加。(IG截圖)

樂壇新人輩出 泳兒無懼威脅︰多啲人先好玩

泳兒去年憑《溝渠暢泳》一曲在樂壇大豐收,贏得不少獎項。(IG圖片)

樂壇新人輩出 泳兒無懼威脅︰多啲人先好玩

泳兒與Gin Lee、衛蘭等《聲夢》導師,為樂壇培訓多位實力新星。(資料圖片)