獲曾志偉賞識獻身無綫 C君出任J2創意總監︰傾緊好多計劃

曾志偉今年初空降無綫成為集團副總經理，而王祖藍則擔任首席創意官，近日無綫再邀得組合農夫成員鄭詩君（C君）出任J2台創意總監。C君昨日回應《晴報》說︰「志偉一直知我成日做創作，所以搵我試下！」洪永城亦指老友C君全程投入︰「佢成個八月晚晚都幫J2諗節目！」

無綫昨日透過內部通訊公布消息，表示37歲的C君將出任無綫J2台創意總監。轉數快兼口才了得的C君，過往曾為港姐等大騷擔任司儀，亦主持多個綜藝節目如《Do姐有問題》、《Do姐去Shopping》系列等。近年他為無綫拍劇，代表作有《降魔的2.0》的風獅爺，他在《雜警奇兵》更擔任第二男主角，與無綫關係友好。此外，近年C君銳意涉足幕後，今年與洪永城拍檔監製新劇《凶宅清潔師》，兼任編審及演出，認真多才多藝。

自嘲着龍袍唔似太子

C君接受訪問時透露昨日是第一日履新︰「係曾志偉邀請我嘅，一直以嚟都有傾節目嘅嘢，我鍾意創作，可能佢一路以嚟知我成日做創作，所以搵我試下！（人工好高？）合適啦！」他笑言20多年沒有做辦公室工作，問到有否着西裝打呔？他說︰「梗係無啦，我連台慶都唔會打呔，正所謂『着起龍袍都唔似太子』。今日（昨日）工作係填表，好多文件要填。」問到日後大計，C君說︰「等我慢慢習慣下先，好多計劃都有傾，往後慢慢推出。」

提到曾志偉曾揚言ViuTV收視只能夠與J2比較，及後ERROR成員郭嘉駿（193）取笑J2《#後生仔傾吓偈》由年過四十的陸浩明主持。問C君是否銳意改革J2？他表示︰「呢啲係大人嘅事，由大人搞喇，我只係做創作，喺節目上創作得好，過程順利最重要。」

洪永城願為老友助陣

另外，C君好友洪永城昨日回應本報，透露見證兄弟的努力︰「見到C君非常勤力，成個八月都埋頭苦幹晚晚幫J2諗節目，我從未見過佢咁忙碌、勤力，相信佢咁投入又有創意，會幫到手！（幫J2做更多幕後工作？）如果佢哋（C君）叫到當然幫手！（《凶宅清潔師》在J2播放當響頭炮？）真係唔知，相信呢個都係佢哋諗嘅元素之一，實質idea就等佢哋公布！」

撰文︰Steven

美術︰梁政敏