193@ERROR寸寸貢網民盛怒鬧冇品 退款後公開客人頭像公審：燒畀你

ViuTV男團ERROR人氣不差於MIRROR，成員193（郭嘉駿）嘅IG followers更一度超越姜濤，而家有40萬fans追蹤。193之前寸咀回應曾志偉嘅言論，又窒友台搵40歲做《#後生仔傾吓偈》，被網民大讚夠薑敢言，仲因為咁人氣再大增，不過經理人花姐都曾告誡佢，認為193講意見時都要理人感受。

{{hket:inline-image name="238360498_353086576509704_3786913544704941625_n.jpg"}}{{/hket:inline-image}}

事緣係193嘅IG網店，有客人喺半年前入數希望購入佢推出嘅一頂帽，但事隔半年仍未出貨，多次inbox亦不獲回覆，於是有人就放上討論區指193嘅網店「走數」。事件越鬧越大，最終「驚動」193處理退款，不過佢就繼續「我行我素」，對呢位客人非常「寸嘴」，更加公開對方icon！

193開設嘅服裝品牌LILABOC喺IG上載對話截圖，從中睇到店家問客人係咪「文盲」同「唔識中文」，更爆粗問對方點解9月開始訂購嘅新款tee，對方1月過數但又要求退款。店家之後又就退款回覆對方「點知你而家用咩account／定係燒俾你／快啦！」

LILABOC之後出埋「限時動態」講述事件：「有個唔睇字嘅人，過咗三百蚊去我account，然後唔知幾耐之後再叫我退錢，已經好奇怪，唔知當呢度ATM定點。再者，間舖無營運咁耐，每日都99+ request，我又唔係急住賺嗰少少錢，所以冇乜撳入去睇，應該來來去去都係問頂帽有冇現貨、tee sizing之類。然後條友上網話我呃錢？自己X咗然後公審我？鍵盤戰士再話番我公審佢？咩世界？我不嬲對住啲我唔鍾意嘅人都係冇禮貌㗎啦，唔鐘意就唔好買囉，唔鍾意咪唔好關注我囉。啲鍵盤戰士打幾隻字我又唔會痛嘅，我都幾享受block人嘅快感，你為咗我開個新account，然後我用一秒又block咗，幾爽。」

不過網民搵到另一張截圖，買家私訊LILABOC表示今年1月買咗頂帽，但係過咗好耐都冇貨收，於是要求退款。根據上文下理，似乎係店方誤會客人訂完tee要退款。不過暫時亦未知LILABOC同客人對話嘅訊息，係咪由193親自回覆。

事件惹來網民強烈反應，有人認為疑似193態度惡劣，甚至有人開post收集被193「走數」嘅故事，例如：「好心佢檢討下自己態度問題，就算人哋搞錯咗，咁對方都好聲好氣咁問你，為何不能有點禮貌地回覆對方嘅問題！唔係吓吓講霸氣就叫做型，做人都係要有基本禮貌好啲，無論對任何人都應該如此！」、「呢啲人一朝得志，語無倫次！」不過都有粉絲撐193工作繁忙，未必有時間處理網店事務！

圖片來源：Instagram

同場加映：《全民造星IV》丨96位女參賽者強勢誕生 193妹余香凝妹成焦點

{{hket:ul-video id="4054"}}{{/hket:ul-video}}