簽約古天樂旗下做女一 周秀娜目標攞影后

周秀娜正式簽約成為古天樂「天高娛樂」旗下藝人，泊到好碼頭的娜姐，近日正養精蓄銳為未來事業搏殺。昨日娜姐出席內衣活動時，透露新公司正籌備一部電影，除了暗示自己有機會做女主角，未來目標更是登上影后寶座，可謂雄心壯志。

周秀娜、王麗嘉及周子涵等昨日出席內衣活動，現場嘉賓位位性感搶「峰」頭，但昔日有性感女神之稱的娜姐，卻身穿長袖樽領衫包到冚，完全零睇頭。已成為古仔旗下藝人的娜姐，表示將專注電影發展︰「其實之前同公司傾咗好耐，好開心可以加入呢個大家庭，依家仲係適應緊。」有指公司為娜姐度身訂造劇本，有望繼《29+1》後再衝擊金像獎，一圓影后夢，她笑笑口說︰「係就好喇，我同公司都有共同理念，有角色啱我一定會畀心機做，劇本都度緊，但應該唔會咁快。（古仔做男主角？）佢部部戲都係男主角，之前我哋合作《P風暴》，係嗰時結緣，依家合作係最好時機。」

辯稱胸骨生得高

另外，提到昨日以密實造型現身內衣騷，娜姐講笑說因與男團MIRROR合作多次，自己也變得「無夏天」，又解釋身上服飾由客戶挑選，主力大騷絲襪及長腿︰「但無諗過一嚟就樽領，可能個客知我怕凍。」最近娜姐頻頻出海滑水，但被網民指她身材走樣兼驚現「排骨胸」，她笑說︰「就係費事畀你哋話我見骨，所以着樽領包住…同埋我胸骨生得高，胸位又生得低，但自己係健康嘅。」她又自爆滑水時試過泳衣移位，幸好有救生衣遮掩才沒有走光︰「自此我就揀啲密不透風嘅泳衣。」

採訪︰倪小珊

美術︰梁政敏