【聲明】港生活網站並無進行電話推廣活動

鄺潔楹不服輸的哈比女神

發佈時間: 2021/09/03

無綫小花鄺潔楹(Judy)樣子甜美,加上155cm的可愛系身高,被宅男追捧為「哈比女神」。外界覺得身高令Judy在圈中發展受限制,但性格堅強不服輸的她,對「哈比」二字卻另有見解,認為是吸引工作機會的優勢:「有啲客戶想sell最細部嘅手提電腦,然後就搵咗我!」

現年29歲的鄺潔楹,入行前正職是業務分析師,副業是平面模特兒,嬌小玲瓏的她搞笑說:「當初真係以為係騙案!嗰陣模特兒公司老闆同我講『我覺得你有潛質,個樣又幾甜,啲客會鍾意你呢類型』,因為係影平面廣告相,只會見到個頭,就唔覺得我咁矮,咁我又覺得無傷害,仲可以賺多份外快!」嘗過幕前工作,後來Judy有機會與無綫娛樂新聞台監製見面,對方要求她先練好廣東話、咬字、望鏡頭技巧等,她決定捨棄沉悶正職,轉行做主播,待時機成熟便獲調派主持J2旅遊節目《3日2夜》。

渴望扮小鳥依人

Judy在《3日2夜》及《學是學非》表現突出而受注目,更因細粒身形獲網民封為「哈比女神」。Judy坦言覺得「哈比」兩字有點貶義,但沒有感到不快,因為自己的確個子小小,從另一角度看,工作上或許有優勢:「其實會帶畀我一啲工作機會,同埋有啲韓劇係sell女主角細細粒,男主角好高大,女主角發生啲乜嘢事,男主角一嘢就攬住佢!呢啲情景好sweet,我都好希望拍愛情劇,可以做被保護嘅女主角。不過拍攝嘅時候,我都唔好意思成日要男拍檔擘開大髀遷就我,因為都好攰嘅!」

學習劍擊勁好勝

在下周結局篇的《七公主》中,Judy飾演見習事務律師方楚瑜,亦是業餘劍擊運動員。她在拍攝前一度懷疑自己能否勝任角色,「監製陳維冠問咗教練嘅專業意見,手短腳短嘅人玩劍擊唔一定輸蝕,好似東京奧運男子重劍金牌得主都係比銀牌得主細粒。」在劇中玩重劍的她,起初學劍十分困難,「劍擊教練教我一啲好難嘅動作,係世界冠軍先做到,當時我眼都凸埋!我學咗四個幾月,要做世界冠軍嘅動作,無可能㗎喎!後來剩番一星期時間,教練話不如同監製講搵定替身,我有啲唔忿氣,因為覺得好唔型囉!可能我有少少好勝,最後強迫自己,好似運動員『無嘢係唔得嘅』嗰種精神,死練爛練,試過開廠拍通宵,收工後瞓兩、三個鐘就起身去練劍,最後我真係做到所有動作!」但她不打算繼續學劍,「因為會令到大腿好粗,我個人比較細粒,想身形修長啲呀。」

Judy不服輸的精神,早在美國讀書時已經表現出來,09年她在路易斯安那州讀高中時,寄宿在一個黑人家庭裏,「嗰年我經歷嘅嘢,好多人都經歷唔到,例如我參加田徑隊,我要同黑人鬥跑步,依家諗番都唔知點解咁有勇氣去報田徑隊,始終黑人嘅運動基因比亞洲人好!我記得跑3,600米長跑,跑第一嗰位快到可以陪我跑多兩個圈,喺側邊幫我打氣都仲得!」

謊稱Uncle係成龍

由於Judy是當時學校裏唯一的亞洲人,因害怕自己被欺負,決定講一個無傷大雅的大話。「唔知邊度嚟嘅靈感,為咗保護自己,我跟同學講我uncle係Jackie Chan(成龍),因為除咗Bruce Lee(李小龍),佢哋覺得成龍好打得又好受歡迎,連我都變得好受歡迎!」她至今仍有跟高中同學聯絡:「佢哋仲問我幾時寄成龍簽名相畀佢哋,原來佢哋仲信我uncle係成龍!同學睇我FB知我做咗藝人,就問係咪uncle帶我入行,原來呢個謊言係唔停得,希望有日遇到成龍大哥,我會問佢攞簽名相,始終呃咗人哋咁多年都有少少唔好意思。」

一按睇片

化粧︰King Yip

髮型︰Terrence Chan @hair

服裝︰tout a coup

撰文:黃曉妍

攝影︰黃敬博、黃紫維

美術:顏玉玲

鄺潔楹不服輸的哈比女神

Judy拍攝《愛.回家》時,與身高逾六呎的袁文傑展現「最萌身高差」。(網上截圖)

鄺潔楹不服輸的哈比女神

為演好《七公主》中的業餘劍擊運動員角色,Judy非常努力練習重劍。

鄺潔楹不服輸的哈比女神

Judy留學時怕被欺負,於是講大話騙同學,自稱跟成龍有親。(網上截圖)

鄺潔楹不服輸的哈比女神

Judy在美國讀書時是肥妹仔一名,跟現在的甜美外表不太一樣。(網上截圖)

鄺潔楹不服輸的哈比女神

Judy主持《3日2夜》表現出眾,因而獲安排拍劇。(IG圖片)

鄺潔楹不服輸的哈比女神

外表甜美的Judy,暗藏男仔頭性格。(IG圖片)