李泳豪帶女友食台灣菜慰思鄉情 戀情明朗化頻曬愛父母心急催婚

李家鼎（鼎爺）細仔李泳豪2011同拍拖9年嘅楊思琦分手，之後一直寄情工作。事隔十年，李泳豪（豪仔）終於再次公開新戀情，現時同女友Agnes拍拖半年有多，有指Agnes相當顧家，賢良淑德，深得未來老爺奶奶施明同鼎爺嘅歡心，好想阿仔快啲將呢個好女仔私有化呀！

{{hket:inline-image name="203473358_334772121418584_2068060610017857777_n.jpg"}}{{/hket:inline-image}}

李泳豪喺母親節第一次公開合照，兩小口一左一右陪住施明，「一家人」去飲茶，有指李家上下都對Agnes讚不絕口；父親節又同鼎爺去食韓燒，仲撓實未來老爺手臂，真係真真正正嘅融入家中唔怪之得，當正佢半邊女！豪仔唔願多講女方背景，只係話對方係台灣人，屋企係做生意嘅，爸爸媽媽長居台灣。疫情期間，女友都好難飛回去台灣，日前豪仔就帶女友去食台南美食，一解對方思鄉之情；豪仔出身「飲食世家」，佢話自己第一次食台南菜，話台灣人對食真係好有要求，難怪同Agnes一拍即合啦！

唔講又講，李泳豪大讚女友乜嘢都好好，愛整潔、廚藝又叻，可以同爸爸李家鼎有話題；而同媽咪更加係冇「婆媳」問題，好多嘢傾，見過面好多次之後已經成為閨密，傾女人經，有時啲話題仲唔畀得豪仔知添！拍拖雖然唔係太耐，男方就一早認定對方，仲話以結婚為目標呀！施明對兒子呢段姻緣好緊張，鼎爺仲頻頻催婚！

豪仔同Agnes同樣都係愛犬之人，兩個不時都會帶埋兩隻狗狗去拍拖。Agnes相當識做，唔介意拍拖同施明、男朋友姪仔（阿哥李泳漢4歲囝囝Alfie）4人行，李家上下都對Agnes讚不絕口，鼎爺同施明更希望40歲嘅李泳豪快啲成家立室。

至於豪仔舊愛楊思琦於2011年搭上吳帥，隔一年生埋女，不過佢同吳帥終分手收場。直到去年女方再誕下一子，聲稱已經結婚嘅佢至今仍然唔肯透露邊個係阿仔嘅爸爸。

圖片來源：Instagram

同場加映：師傅愛你丨七仙羽驚艷客串演出MV 送9條毛助「鬼王」潘紹聰財氣

{{hket:ul-video id="4089"}}{{/hket:ul-video}}