練美娟（娟姐）是一位性情中人，相信緣份，緣份曾令她失去電台工作機會，但亦因為緣份，她成為ViuTV大家庭的其中一個成員，她早前接受《晴報》專訪時，一面自豪地說：「我覺得係緣份，好開心而家做緊嘅嘢係自己覺得舒服！」
在2012年，娟姐讀大學時參與Now TV的大學生Talk Show節目《18/22》，她指主持人是台灣藝人陳建州（黑人）、陳俞希（Hailey）和駱振偉（Thor），「當初玩係因為唔使返學，可以走堂，又可以賺外快，嗰陣日日返去玩，唔覺得係做嘢，呢個係我第一份幕前工作。」之後有一個工作機會，或者緣份未到而錯失，事緣黑人沒有再主持《18/22》，找來商台DJ余迪偉接手，當時余迪偉在商台有個節目《一八七二遊花園》，但因其中一位主持阿Bu離職，所以余迪偉及另一位主持鄒凱光（攤叔）希望找個女主持補上，「佢哋接觸咗我哋呢班大學生，逐個叫我哋去interview，其實我知道佢哋幾喜歡我，問我想唔想入行，但由細到大我都冇諗過（入娛樂圈），同埋我有家庭負擔，有經濟考慮因素，所以我當時好決絕話冇興趣，咁就bye bye咗，個個都問我點解可以親手奉送咁好嘅機會，可能真係緣份未到！」
《甜爺爺》︳夏韶聲當年奉子成婚拒女友墮胎 教女兒「搞出人命」忌先找經手人【下一頁】
在大學畢業後，娟姐先後在電影公司、娛樂公司和廣告公司工作，2016年4月ViuTV正式開台啟播，娟姐的朋友問她有沒有興趣入ViuTV，她有感當時幕後工作做到沒動力、沒成功感，於是決定一博，在2017年加入ViuTV，不過她否認有個「演員夢」，肯定的說：「老實講，由細到大表演慾係強，我鍾意唱歌，同埋我有諗過參加香港小姐，真心嘅。我唔吝嗇話畀大家聽，細細個貪靚，成日睇電視見到啲女仔拎住個獎項，有個皇冠（后冠）好靚！但人越大，就覺得冇乜特別啫，但我讀書修嘅科目、出嚟做嘢，全部都關娛樂圈呢行事，我覺得係緣份，好開心而家做緊嘅嘢係自己覺得舒服，因為身邊嘅朋友話返工返得唔開心，我好慶幸而家做嘅嘢，雖然唔係由細到大嘅夢想，而家係最處之泰然，呢份職業令我每天都好歡樂。」
與MIRROR拍《大叔的愛》 練美娟：好多人妒忌我【下一頁】
藝人風光背後，其實有苦自己知，娟姐說︰「好多人問我之前嘅財政係咪好緊絀，又住劏房，問我低潮係點樣。其實我覺得好多人比我更加低潮，我唔分享我嘅低潮係點點點，我要捱麵包咁咁咁，因為好多人都試過，我覺得做得呢行，應該冇人會預計到自己會好搵到錢。因為我覺得呢行係熱誠大於收入，點解仲要做落去呢？啲人講係虛榮感，我覺得係滿足感，所以睇你點睇。我（入行）頭3年，除咗生活必需開支之外，仲要畀家用，我又有隻狗仔，又自己搬出嚟住，負擔係大，但冇辦法，呢個係我自己選擇，所以唔會覺得係我人生低潮，每個人都會遇到緊絀嘅位，我應該冇低潮，因為我好睇得開。」
娟姐主持的《晚吹 - 有酒今晚吹》，她在節目中的豪邁，常叫嘉賓「飲啦」，又或者飲到high high哋的時候，對嘉賓窮追不捨的追問，她坦言事後有後悔，「頭幾集，我真係飲醉咗，雖然話工作需要，但係要拿捏分寸，做幕前就要有榜樣，做公眾人物要有責任。至於我嘅底線，希望喺飲酒節目，飲還飲，但唔好再飲醉，好慶幸自己有酒品；嗰次訪問Dee姐（陳海寧），我真係醉咗，但總算問到我要問嘅嘢。」
ERROR家屬聚會丨練美娟狙擊193緋聞女友 Dee姐求饒：唔好令3萬個『老婆』攻擊我【下一頁】
在《大叔的愛》飾演Carmen姐，她非常饞嘴，令觀眾留下深刻印象，種種的成功，為她帶來了名氣，娟姐說：「帶畀我除咗係滿足感之外，仲令我對待人接物呢樣嘢成熟咗，例如《晚吹》節目，每次訪問唔同嘉賓，都係飲住酒去做，大家都喺一個好chill嘅狀態，起碼我會放開咗自己同佢哋去傾偈，我都多謝拍檔強尼，佢係一個幾關照我嘅前輩，而公司都幾鍾意我拍佢做節目，我諗係佢嗰種穩重、老練，我嗰種活潑、直率，大家會撞到一啲火花。至於演戲，係我第一次嘗試，我冇諗過觀眾會咁喜歡，我同劇組人員講，我演呢個角色會唔會演得太活潑？太作狀？我記得佢哋話好滿意，慶功宴嘅時候，無論打燈叔叔，或者收音哥哥，個個都話『我鍾意你，令到成個氣氛好開心，你繼續努力』，唔好話fans，連工作人員都畀鼓勵我，真係覺得好感恩。」提到她一招「手撕雞髀」，娟姐笑說：「其實我唔明大家點解咁驚訝，手撕雞髀好容易，滷水喎，浸到淋晒！」
娟姐指自己向來都很粗魯，入行後，已經收歛了少許，「識我嘅人，見我幕前演出都唔會覺得出奇，因為佢哋認識嘅我係更加瘋癲，某程度上，我係代表香港一小撮女仔，我都相信喺一個角落，充滿住好似我呢啲咁麻甩、冇所謂嘅女仔。」有人認為娟姐是「吳君如2.0」，她聞後感謝大家，「好多謝大家咁大高帽，某程度上，我認同自己帶到歡樂畀大家，但我真係唔敢高攀，呢個名太大，接唔住呀！」
攝影：黃紫維、何家賢
撰文：黃曉妍
U Lifestyle App自家節目登錄《U TV》專區！
↓↓試玩、試食、試用影片任您睇↓↓
【立即體驗】