近日梁朝偉（偉仔）主演的Marvel大片《尚氣與十環幫傳奇》好評如潮，近日他馬不停蹄接受外國傳媒訪問，全程以英文對答。「英語達人」兼YouTuber馬米高日前拍片，點評偉仔受訪時的文法及用字，他昨晚接受《晴報》訪問時稱︰「佢嘅英文拍荷里活片夠用有突！」
馬蹄露姪仔馬米高曾效力無綫七年，擁有中學英文教師資格的他，離巢後經常在網上拍片教英文，其YouTube頻道有近22萬人訂閱。日前，馬米高在YouTube以「梁朝偉的英文夠拍Marvel？」為題，評價偉仔接受外媒訪問時的用字、發音等，當中提到偉仔曾將超級英雄「Deadpool（死侍）」讀成「Deadpoo（死了的糞便）」，直指這位男神犯下不少港人講英文的常犯錯誤。不過，馬米高亦非常敬重貴為五屆影帝的偉仔，並大讚他敬業樂業︰「一個中三畢業嘅演員英文講到咁樣，發音發到咁樣，其實已經好過大部分香港嘅大學生，睇得出佢落咗好多苦功。」
爆偉仔機上親民有禮貌
曾任空少的馬米高，在片中亦披露他與偉仔早有淵源，原來他曾在由北海道回港的航班上接待偉仔。馬米高稱︰「佢戴住口罩上機，全程都好有禮貌，唔該前唔該後，講嘢又細聲。」他大讚偉仔道︰「我問佢可唔可以同一個女同事合照，佢諗都無諗就一口應承，仲成功攞到簽名！」馬米高指這位男神非常親民，值得畀like。不過，有網民不滿馬米高在片中多次強調偉仔只得中三學歷；有粉絲則認同偉仔講英文流暢，其努力值得表揚。
鼓勵大家多進修
對於偉仔的英文能力，馬米高接受本報訪問時稱︰「佢啲英文正如我影片所講『好過好多大學生』，今次條片標題係想引起大家嘅興趣，有睇晒我成條片嘅觀眾都知，梁朝偉英文夠用有突！（捉偉仔錯處怕佢會嬲？）唔好話英文，就算廣東話正常講嘢都會有口誤…我睇咗好多條梁朝偉同外國傳媒嘅訪問片，先整理到一啲大家成日會犯嘅英文錯誤，藉此同大家研究。」他強調，該段影片的用意是鼓勵大家以梁朝偉為榜樣，努力進修增值自己，他笑謂︰「咁正面嘅信息，我喺飛機上served過咁好人嘅梁生又點會嬲我？」
撰文︰Steven
採訪︰Pat
美術︰梁政敏