新城市廣場中秋嘉年華 開心買應節食品環保手作

過幾日就到中秋節，黛安都想趁佳節同好友聚下，聽聞沙田新城市廣場一期喺周日（19日）至下周二（21日）同社聯合作，邀請十多間本地社企舉行「Give Me Five社企嘉年華」，場內除咗可買到應節食品同環保手作，仲有親子工作坊，等大家可以開開心心過節。

今次嘉年華嘅應節食品種類繁多，例如有明愛天糧包餅工房嘅低糖健康月餅、樂膳堂嘅慈善義賣月餅，同埋手工製曲奇、雪花酥同鳥結糖等；至於環保精品同手作方面，就有泰國紮染布頭帶、環保飲管、手雕麻將等。

姊妹話，下周一（20日）場內會有環保創意燈籠班，可以親子一齊整燈籠；同日仲有親子泰拳體驗班，由專業教練親自指導大家泰拳動作，一齊感受打拳嘅快感。The Point會員只要以指定積分，即可帶同一位5至12歲小朋友參加工作坊喇，名額先到先得。