百萬拳賽|鍾培生花千萬搞拳賽幫死敵「洗底」 扣林作6萬拳酬被網民鬧小家

林作及鍾培生的「百萬大戰」上周六結束，鍾培生未能兌現首兩回合K.O.拳擊新手林作，最後打足四回合以點數贏對方。日前林作設慶功宴多謝佢嘅教練團隊，並指今次拳賽佢贏晒，更加話鍾培生係畀錢佢使嘅恩人，搞千萬拳賽嚟捧紅佢，唔知鍾培生有冇激到紮紮跳呢？

同場加映：【娛樂直擊】陳家樂符碌叨光中六合彩 劉佩玥被爆手機睇鹹網

{{hket:ul-video id="4229"}}{{/hket:ul-video}}

{{hket:inline-image name="242399187_373372227793650_3170421208070554581_n.jpg"}}{{/hket:inline-image}}

當晚慶功宴林作遞上豬肺湯慰勞佢師傅向柏榮，又送上8萬8千8百期票，𠱁到師傅笑到見牙唔見眼。林作喺拳賽後兩日經已上咗去鍾培生辦公室拎支票，由鍾生秘書轉交一張$943,440期票畀林作，畀唔足100萬，原來係從中扣咗林作認購嘅門票錢，向師傅就問：「唔係拳酬同飛錢分開計？唔應該咁扣數㗎？」師兄李俊亨（Henry）笑鍾培生「庹縮」，怕林作「走門票數」！林作笑笑口回應：「咁應該攞住100萬『靚仔』啲，不過，佢講過以優惠價賣飛畀我，而家竟然收正價，算啦！冇所謂我接受，冇投訴！」

林作唔介意收少啲，又引用第一次世界大戰後邱吉爾嘅金句解釋：「戰後要對敵人慷慨，更何況我經已攞盡光環，網上99.9%都係撐我，我好滿意畀番0.1% credit佢！客觀嚟講佢畀錢我使，係我恩人，多謝佢畀呢個機會我，尤其由負面形象轉做正面，仲用千萬製作拳賽嚟捧紅我！所以今次得着好多，全面贏晒！佢真係一個大慈善家，係我再生父母，師傅預判得好，如果佢跌落我哋心理及戰術圈套就會一面倒，我諗佢都估唔到會咁插水。」

向師傅指林作四個回合共打出121拳，清晰擊中鍾培生40拳，破壞性有7拳；至於鍾培生四個回合共打出184拳，清晰擊中林作40拳，破壞性有7拳，林作只係輸主動性，又指鍾培生打得「好渣」，戰術又錯晒，唔應該唔限對手體重，而且體力差又沉唔住氣，佢咁講︰「我叫林作食肥啲，去到第四Round鍾培生因為太攰，畀林作呢嚿肥豬肉壓住都冇晒反抗能力。」對於網民指林作「外賣仔」式打法，佢哋唔收貨，向師傅強調：「世界級都係咁走，咁避㗎啦！只係佢『陀地級』唔夠靚仔，其實得半年時間做到心法經已好好。」

{{hket:inline-image name="n5BJnVA.png"}}{{/hket:inline-image}}

事實上，網上嘅討論都係撐林作多，認同今次拳賽係有幫到佢「洗底」，又認為鍾培生賽前「牙斬斬」，但竟然面對新手林作都無法K.O.對方，表現令人失望。又有網民大讚鍾培生係「找數真漢子」，不過就覺得佢身為「百億身家富三代」，以正價扣起林作拳酬作為門票錢非常孤寒肉酸；當然亦有人力撐「數還數」，仲話夠「均真」都係致富嘅關鍵！