【聲明】港生活網站並無進行電話推廣活動

榮升麻甩系女神 練美娟:我代表香港一小撮女仔

發佈時間: 2021/09/24

練美娟(娟姐)憑ViuTV劇集《大叔的愛》的「Carmen姐」一角上位,戲裏一幕「手撕雞髀」成為熱話,戲外的她同樣大情大性,主持節目時又常常以沙啞聲綫叫嘉賓「飲啦」,令她多添幾分麻甩味。這位麻甩系可愛女人,在一眾性感、甜美或氣質型女星中可算異數,她說:「我相信喺某個角落,充滿好似我呢啲咁麻甩、咁無所謂嘅女仔。」

90後的練美娟,在《大叔的愛》中扮演八卦為食的Carmen姐,跟「平哥」楊偉倫約會時,更豪邁地一手撕開雞髀。娟姐重提這一幕時搞笑說:「其實我唔明大家點解咁驚訝,手撕雞髀好容易,滷水喎,浸到淋晒!」娟姐不是娛圈新鮮人,她讀大學時已主持Now TV大學生節目,畢業後亦從事娛圈相關工作,到17年才加盟ViuTV做藝人,但做演員從不是她的夢想。「由細到大表演慾強,我鍾意唱歌,又諗過參加香港小姐。但大個咗覺得無乜特別,只係讀書修嘅科目、工作,全部都同娛樂圈有關,我覺得係緣份。雖然入行唔係我嘅夢想,但呢份職業令我每日都好歡樂。」

曾住劏房不覺經歷低潮

入行後,娟姐試過半年零收入,更要住劏房,她不以為然。「好多人問我低潮係點樣,其實我覺得好多人比我更低潮。做得呢行,應該無人會預計自己會搵到好多錢,因為我覺得入行係熱誠大於收入。我入行頭三年,除咗生活開支,仲要畀家用,加上我養狗,又搬出嚟住,負擔係好大但無辦法,呢個係自己選擇,所以唔覺得嗰段時間係人生嘅低潮,因為我好睇得開。」

娟姐在《大叔的愛》的演出,為她帶來名氣,「我無諗過觀眾會咁鍾意,我問過劇組人員,我會唔會演得太活潑?太作狀?到慶功宴時,無論打燈叔叔定收音哥哥,個個都話『我鍾意你,你令到成個氣氛好開心,你繼續努力』,連工作人員都鼓勵我,真係好感恩。」

唔敢高攀做「君如2.0」

網民常說「搵女友最好搵麻甩女漢子」,娟姐正是人辦,自認粗魯的她,其實在幕前已經收斂。「朋友見到我嘅幕前演出,都唔覺得出奇,因為私下嘅我係更瘋癲,某程度上,我代表香港一小撮女仔。」她在《晚吹-有酒今晚吹》一邊飲酒一邊主持,她坦言:「頭幾集我真係飲醉咗,雖然話工作需要,但要拿捏分寸,做幕前要有榜樣,做公眾人物要有責任。我嘅底綫飲還飲,但唔好再飲醉!」有網民讚娟姐是「吳君如2.0」,她笑說:「多謝大家咁大頂高帽,我認同自己帶畀大家歡樂,但我真係唔敢高攀,呢個名太大,接唔住呀!」

做手術變走招牌沙聲

娟姐說話大大聲,聲綫相當沙啞,麻甩味更重。不過現在的娟姐聲音清脆得多,原來她早前做手術割除聲帶瘜肉。「我唔係天生聲沙,大學畢業後開始講嘢『揮霍無度』,成日大叫、唱K、玩天光先搞到咁。」她坦言覺得沙聲有特色,沒想過正視問題,但拍攝《大叔的愛》時跟黃德斌熟稔,「德斌叫我整好把聲,日後無論做主持或演戲,角色變化更大,直情當頭棒喝!」手術後娟姐接受言語治療,重新學習發音,笑言現在的聲綫變得優雅大方。

【一按睇片】

撰文:黃曉妍

攝影:黃紫維、何家賢

美術:顏玉玲

榮升麻甩系女神 練美娟:我代表香港一小撮女仔

娟姐在《大叔的愛》中咬牙切齒手撕雞髀,相當可愛。(網上截圖)

榮升麻甩系女神 練美娟:我代表香港一小撮女仔

娟姐屬「有料之人」,偶而在社交網派福利,大受網民喜愛。(IG圖片)

榮升麻甩系女神 練美娟:我代表香港一小撮女仔

娟姐自爆主持《晚吹 - 有酒今晚吹》時飲醉,慶幸有酒品所以沒出醜。(IG圖片)