【聲明】港生活網站並無進行電話推廣活動

難忘親熱戲 湯洛雯︰「萬人」圍觀下咀嘴

發佈時間: 2021/09/24

演員少不免要拍攝親熱戲,但原來背後的拍攝工作並非易事,不同的咀嘴戲也各有各難度。未知對演員來說,怎樣的親熱戲最具難度?在過往的經歷中,又最難忘哪些親熱鏡頭呢?

湯洛雯(靚湯)拍攝的劇集幾乎都離不開咀戲,她認為最激烈的一次,是與譚俊彥拍攝《失憶24小時》,她說︰「劇情講譚俊彥自小患有心理病,最怕行雷,而其中一場戲就係我同佢喺屋企,當時雷雨交加,我要畀安全感佢,於是情到濃時就咀嘴。」

不過,靚湯指最難忘是與張振朗拍攝《機場特警》,兩人於灣仔「萬人空巷」的環境下激吻,她笑謂︰「因為地方太開揚,現場『萬人』圍觀,咁多對眼望住我同張振朗錫錫,我哋又忍唔住笑,加上要拍攝幾個角度,錫咗好多次都幾尷尬。」

張振朗︰難忘錫哨牙蔡思貝

張振朗在《踩過界II》內與蔡思貝有感情綫,兩人關係相當微妙,振朗解釋︰「有場戲講我同思貝飲醉酒,醒後大家以為做錯事,但其實咩都無發生過。思貝喺劇入面哨牙,咀埋去嗰下都幾得意,(有無畀佢咬到流血?)咁又無,不過我哋咀完仲要舔一舔。我好開心場戲出街之後,觀眾反應都幾正面。」

振朗又得戚笑說︰「每次拍咀戲都係女方做主動…其實我入行以嚟,仲未試過拍激情嘅咀戲,但我又唔係好恨拍,始終唔知對方點諗,所以盡量都唔好拍呢啲啦。」

劉佩玥︰感激黃宗澤帶入戲

向來形象清純的劉佩玥(Moon)16年在《幕後玩家》的性感造型,曾在網上引起熱話,她形容該場戲十分難忘︰「因為嗰場戲要我推低Bosco(黃宗澤),再瞓喺佢身上,我又着住性感內衣,所以拍攝過程一直都好緊張。」

當時Moon仍然是演戲初哥,但她十分感激Bosco的協助,「一直以嚟我喺鏡頭前都好男仔頭,都擔心自己唔識處理嗰場戲。好彩我同Bosco拍攝前溝通得好好,佢仲教我點做,成件事好smooth。如果無佢,心理上都會有啲唔舒服。」

馮盈盈︰與狗仔「親熱」

親熱戲離不開男女之間的咀嘴戲,但馮盈盈直言最難忘的「親熱」戲,是在《逆天奇案》中被狗仔不停舔她的手,她說︰「我第一次同動物做對手戲,難度真係好高,始終我哋估唔到動物會做啲乜,所以場戲都NG咗好多次,拍咗成朝先搞掂。」

盈盈指拍攝時正值夏天,狗仔與人一樣需要降溫,因此工作人員特別準備大量冰塊讓狗仔敷肚散熱,她表示︰「如果無冰喺手,狗仔即刻走咗去,所以工作人員要成日遞啲冰吸引狗仔埋嚟,佢哋真係歎過啲人。」

採訪︰Pauline

美術︰顏玉玲

難忘親熱戲 湯洛雯︰「萬人」圍觀下咀嘴

靚湯最難忘與振朗在公眾場合拍親熱戲。(網上截圖)

難忘親熱戲 湯洛雯︰「萬人」圍觀下咀嘴

振朗笑言不想拍激烈的親熱戲。

難忘親熱戲 湯洛雯︰「萬人」圍觀下咀嘴

振朗與思貝在《踩過界II》有微妙的感情綫。(網上截圖)

難忘親熱戲 湯洛雯︰「萬人」圍觀下咀嘴

Moon認為拍親熱戲前,要與對手有良好的溝通。

難忘親熱戲 湯洛雯︰「萬人」圍觀下咀嘴

當時Moon的性感造型引起網民熱烈討論。(網上截圖)

難忘親熱戲 湯洛雯︰「萬人」圍觀下咀嘴

盈盈指與狗仔拍劇十分開心,但難度也相當高。

難忘親熱戲 湯洛雯︰「萬人」圍觀下咀嘴

盈盈在《逆天奇案》與陳展鵬有床戲,但她卻難忘與狗仔的「親熱」戲。(網上截圖)