父子檔上節目 王俊棠囝囝高大靚仔搶Fo

無綫遊戲節目《思家大戰》前晚播出第四集，今集嘉賓有安德尊（大王）、姚嘉妮等組成的「都市李的錯」隊，以及魯振順與女友Julie、王俊棠伉儷及兒子王東泰（東東）組成的「王魯五」隊，其中190cm高的東東青靚白淨，加上表現淡定，成為當晚亮點。

節目其中一題「你同另一半煙韌時，你嘅五歲小朋友入嚟問你哋做緊乜，你會點解釋」，當中只有姚嘉妮和大王分別以「做緊運動」及「爸爸媽媽依家讀緊生物衞生傳宗接代科」答中上榜答案。不過「都市李的錯」最後依然敗給「王魯五」隊，魯振順及王俊棠更以無敵默契成功贏走五萬元的獎金獎品。