簡慕華恨同小鮮肉合作 黃德斌證《大叔》拍續集

黃德斌和簡慕華挾劇集《大叔的愛》人氣急升，昨日兩人合體出席床褥活動，齊齊搵真銀。兩人昨日證實已預留檔期開拍《大》劇續集，簡慕華更直言想與更多小鮮肉合作，她笑說︰「邊個都得，最緊要係小鮮肉。」

黃德斌與簡慕華昨日出席活動，德斌透露兩人之後會再合作，問他是否開拍《大》劇續集？他直言︰「係有咁嘅計劃，但未落實。」簡慕華亦表示︰「劇組有問過我哋啲期得唔得，不過詳情要等佢哋公布。」至於是否原班人馬上陣？德斌透露︰「睇大家檔期，依家都度緊大家啲期，但可能最快出年先拍到。（想拍續集定電影版？）兩樣都拍啦！」簡慕華即笑言︰「兩樣都拍先好，收兩樣錢，哈哈！」

願合唱片尾曲

至於希望《大》劇的故事如何延續？簡慕華笑稱︰「今次梗係到我有得揀啦！」除了MIRROR成員邱士縉（Stanley）外，她希望劇組可安排更多小鮮肉跟她做對手戲，「希望結局可以再sweet啲，再多幾個小鮮肉彈出嚟。（心目中有咩人選？）無，邊個都得，總之係小鮮肉就得。」德斌則希望續集可以延續歡樂，他說︰「始終係喜劇，大家合作開有晒默契，觀眾都熟悉，希望到時有啲新鮮元素。」

除了戲劇方面的合作，簡慕華提議可嘗試合唱，德斌聞言即苦笑謂︰「即係畀難題我啫，標晒汗，我唱歌大家真係有目共睹，不過都係好提議。」問他們可有興趣合唱主題曲？德斌笑指︰「主題曲就唔好喇，片尾曲算啦，合唱歌會穩陣啲。」

採訪︰倪小珊

攝影︰林良明

美術︰梁政敏