【聲明】港生活網站並無進行電話推廣活動

心痛個唱再被炒飛 陳卓賢冀做好榜樣啟發粉絲

發佈時間: 2021/09/30

人氣男團MIRROR成員陳卓賢(Ian)昨早以代言人身份出席汽車活動,自認是超級車迷的Ian,笑言會努力賺錢買車。對於他與MIRROR五位成員將於12月開騷,但有家長要求主辦方取消個唱,Ian坦言明白父母的心態,所以MIRROR會做好榜樣,啟發年輕人追夢。

陳卓賢昨日出席汽車活動,熱愛汽車的Ian自言喜歡速度感,所以從小就喜歡跑車,並笑言買新車後會第一個接載隊友江𤒹生(AK)。Ian透露現時只有一架車代步,因此會努力賺錢,希望將來擁有自己的車房。提到日前隊友姜濤與柳應廷有份演出拉闊音樂會,MIRROR成員獨欠Ian未有現身撑場,他解釋當日有工作在身︰「開心姜濤有唱我首《DWBF》,唱得好好,佢又特別排過隻舞,仲跳得好過我。」

盧慧敏不介意做倒數第一

MIRROR其中六子將於12月舉行個唱,但早前網傳有家長以反對子女追星為由,希望取消個唱,有份演出的Ian表示︰「其實我都好明白父母嘅心態,想小朋友專心學業,所以我哋要做好榜樣,畀年輕人睇到我哋點樣追求夢想,做自己鍾意嘅事。」對於音樂會再出現炒飛熱潮,Ian大感無奈︰「睇到呢啲情況我真係有啲心痛,真係唔希望大家幫襯黃牛,因為幫襯佢哋只會助長呢種風氣。」Ian期望個唱有網上直播,讓更多鏡粉欣賞演出。

另外,Ian女友盧慧敏(Amy)昨午出席另一品牌活動,對於Ian表示新車落地會第一個接載AK,Amy直言不介意,更笑言自己可能是倒數第一。而Amy將於下月初生日,她希望與家人一同度過,至於男友有何表示?Amy說︰「太快啦,不過佢都唔係好浪漫嘅人,少啲畀驚喜,我哋都鍾意簡單啲。」

採訪:Pauline

攝影(部分):林良明

美術︰梁政敏

心痛個唱再被炒飛 陳卓賢冀做好榜樣啟發粉絲

Amy指男友不太浪漫,甚少準備驚喜。