【聲明】港生活網站並無進行電話推廣活動

無懼《聲夢》《#後生仔》後浪 江嘉敏:目標8年後拎視后

發佈時間: 2021/10/04

人生變幻無常,星途亦難以預計,廣告模特兒出身的江嘉敏(Kaman)16年加入無綫,從《親親我好媽》的純情學生妹進化成是非多多的「心機女」,成功在電視圈佔一席位。無論面對正評或負評,Kaman處之泰然,寧願將精神花在事業及瘦身。「我唔太理網上嘅haters,依家全力拍劇,演嘅角色慢慢有改變同進步,希望八年後贏視后!」果然目光遠大。

江嘉敏加入無綫前,拍過不少廣告、微電影及港台劇集,她憑無綫劇集《親親我好媽》的中學生一角正式入屋,至今已拍攝了十多部劇集,其個人IG亦已吸納超過30萬追隨者,演藝生涯尚算順風順水。Kaman現正與陳豪、周嘉洛等拍攝陳維冠(Joe)監製的時裝劇《四十二章經》,Kaman與Joe已第四度合作,她感恩遇上這位好監製,令她明白機會是留給有準備的人。「之前拍《七公主》要彈一首蕭邦嘅曲目,20幾頁琴譜好有難度,好彩我細個嗰陣,媽咪畀錢我學琴,終於可以大派用場。」過往曾學習二胡的她,現時亦抽空學習小提琴,寧犧牲休息時間,為演戲路做足準備。

磨練演技打好基礎

為拍《四十二章經》,Kaman犧牲靚靚長髮變身男仔頭,她透露劇中有不少吊威也戲份,因此嘗盡苦頭。她說︰「雖然係時裝劇,但拍攝前要學劍又要學棍,天氣酷熱下,吊威也一日後,成件衫濕晒,Joe迫我行出comfort zone,去試唔同嘅嘢。」Kaman拍劇多年,經常演主角妹妹或少女角色,但她深信自己已不斷進步。「我由《誇世代》嘅七妹變成《七公主》嘅四家姐,已經愈嚟愈成熟,每個角色都有唔同元素,自己亦急唔嚟,要慢慢打好基礎。」

身為無綫力捧小花之一,Kaman坦言沒想過能密密拍劇,她向公司要求將工作重心繼續放在劇集上,努力磨練演技。「由《親親我好媽》開始,我都係邊學邊做,依家跟甄詠蓓上演技進修班,發覺自己講對白唔夠大聲。」提到現時無綫《聲夢傳奇》、《#後生仔傾吓偈》等大堆演藝新血正蓄勢待發,現年26歲的Kaman已累積五年「劇齡」,她對自己信心十足,更劍指視后︰「我會再努力啲,短期目標要喺五年內贏『我最喜愛的電視女角色』,八年後到我30幾歲,贏到視后就啱啱好!」

喪忍口誓踢走脂肪

早前Kaman為《代溝關注組》任嘉賓,自爆過去曾被男友背叛導致分手收場,更稱曾撞破TVB男同事偷食;不過她與馮盈盈的恩怨更好睇,二人去年由好姊妹反目變陌路人,但今年初卻被安排合作主持《解構心機女》,成為圈中話題。對於與過氣好姊妹做拍檔,Kaman拒絕多談舊事,只說︰「有其他主持分擔都OK。」不過,Kaman從節目中亦有得着,她感慨道︰「以前做過活動司儀,但主持清談節目又係另一回事,比拍劇艱難好多,要應付嘉賓忽然答非所問,好在當時有經驗豐富嘅賴慰玲係隔籬!」

Kaman的身形時肥時瘦,其包包面更深入民心,她承認減肥是終身事業。「我今年初喺台慶頒獎禮個排,食嘢無乜節制;依家拍劇期間,日日自備水果返工,晚上六點後只會食蘋果或青瓜。我以前好少飲水,依家每日最少一公升,已經瘦咗十幾磅。」談到自己經常成為花生友話題,她相信網上有haters,但亦有支持者︰「我已經唔睇討論區,只睇自己IG,有啲網民為鬧而鬧,亦有啲人打一大段嘢真心畀意見,對我嚟講所有嘢都有啟發!」

場地︰Camellia (尖沙咀)

服裝︰Aleshia

化粧︰Katrina CM Chu

髮型︰Jair Tsou @Salon de Lotus

攝影︰Alma

撰文︰Steven

美術︰梁政敏

無懼《聲夢》《#後生仔》後浪 江嘉敏:目標8年後拎視后

今年初Kaman出席頒獎禮時「肉感」十足,慘成網民笑柄。(資料圖片)

無懼《聲夢》《#後生仔》後浪 江嘉敏:目標8年後拎視后

Kaman與馮盈盈的恩怨好睇過連續劇,無綫更乘勢為二人開拍《解構心機女》。(IG圖片)

無懼《聲夢》《#後生仔》後浪 江嘉敏:目標8年後拎視后

Kaman減肥兼剪走秀髮,以男性化形象拍《四十二章經》。(資料圖片)

無懼《聲夢》《#後生仔》後浪 江嘉敏:目標8年後拎視后

八年前的Kaman已跟何潤東合作拍攝安全套廣告。(網上截圖)