23歲馬在驤被網民彈「老顏」 馬德鐘為兒子平反：我入行已經演臘肉

馬德鐘和兒子馬在驤在無綫劇集《我家無難事》中，首次父子檔上陣，雖然馬在驤客串飾演年輕版馬德鐘，但因挾爸爸之名而成為焦點，網民對高大威猛的他評頭品足，批評他看來比53歲的父親更成熟。昨日馬在驤接受《晴報》訪問，沒好氣指「生得成熟無辦法」；馬德鐘亦為兒子平反，直言自己初出道時已不是演「小鮮肉」，可見父子同心。

馬德鐘在《我家無難事》飾演性格無賴的「郭得勤」，角色被評為自私小氣又自以為是，令觀眾看得十分肉緊，該劇監製王心慰都大讚他的誇張演技令人眼前一亮，其高大健碩的外形，加上賤賤格格又搞笑的演技，網民更指他似足漫畫角色孟波，掀起熱議。昨日馬德鐘與馬在驤父子一同接受本報訪問，馬德鐘笑言大愛「郭得勤」一角：「雖然人物性格好似有啲誇張，但社會上真係有啲咁嘅人。（網民話你似孟波？）造型係監製設計嘅，佢好堅持我要將頭髮放落嚟，咁我話試下，出嚟又真係有嗰個效果，佢好有眼光。」

預告「郭得勤」終會醒覺

今次激罕演繹誇張搞笑角色，馬德鐘直言大眾認定主角有光環，甚少看到主角有這麼多缺點，但「郭得勤」終有一日會醒覺︰「大家睇落去就知咩事令佢改變。（網民話劇中感覺太瘦？）無辦法，我拍《我》劇時，同時拍緊《飛虎之壯志英雄》，頂得到算係托賴。」至於馬在驤透露有追看自己的處男演出，他更搞笑地批評爸爸飾演的「郭得勤」：「你個角色咁煩嘅！」馬德鐘即謂︰「咁就啱喇，如果觀眾有呢個反應係啱嘅，因為呢個角色真係好討厭，佢唔討厭又點帶得出呢個人物性格。」

辯稱生得成熟無問題

現年23歲的馬在驤遺傳爸爸的優良基因，生得高大健碩兼黑黑實實，不過有網民卻批評他明明年紀是小鮮肉，但樣貌竟然比爸爸生得成熟。馬德鐘聞言立即為乖仔平反說：「其實我自己當年一出道，都無做過小鮮肉，喺《創世紀》已經演大哥，所以我一入行已經做『臘肉』，去到50歲都仲係做『臘肉』。」馬在驤則略帶不滿謂︰「成熟咪成熟囉，有咩辦法啫，網民都講咗好耐啦，搵啲新嘢嚟講下啦！我覺得無問題㗎，每個人形象都唔一樣嘛，如果唔係，咪全部人都一樣？」有網民更指馬在驤與AV男優加藤鷹撞樣，馬德鐘即搶答︰「佢唔識㗎，佢唔係好知呢啲。」

撰文︰Pat

採訪︰Steven

攝影︰林良明

美術︰梁政敏