【聲明】港生活網站並無進行電話推廣活動

自爆會考「揸梯」 吳君如返母校勉勵師妹

發佈時間: 2021/10/08

吳君如日前返母校聖士提反女子中學分享求學經歷,曾贏得港台兩地影后的君如,在一班師妹面前自爆會考成績「揸梯」(H級)的瘀事。形容自己輸在起跑綫的君如,自言等了40年終有幸回母校分享,她興奮得熱淚盈眶,更揚言比拿到金像獎最佳女主角更開心。

君如日前帶同老公陳可辛及女兒陳是知一起重返母校,君如在座談會上跟師妹們分享讀書的心得及趣事,她說︰「我係1982年考會考,幾乎科科『揸梯』。大家知唔知咩叫『揸梯』?即係成績係H,ABCDE係合格,F已經唔合格,仲有G同H,明啦?嗰陣我心諗,唔合格畀個G我都得啩?究竟個H係乜嘢嚟?真係莫名其妙。」

一世留有陰影

分別於99年及03年奪得金像獎及金馬獎最佳女主角的君如,成績有目共睹,但她形容自己亦曾輸在起跑綫,君如說︰「1985年考評局取消咗G同H,佢哋都算做咗一件好事,你知我哋留咗成世陰影,究竟係咪衰到要『擔梯』?究竟嗰日係咪份卷無做過呢?我呢啲就係輸在起跑綫,我行得比人慢,等咗40年,等到今日,你哋畀機會我,返番嚟母校,今日真係好開心,好榮幸!」

君如愈講愈興奮,她開心得手舞足蹈表示︰「你哋唔知我有幾開心,開心過攞金像獎最佳女主角,依家講起都想流眼淚。I am so proud of聖士提反女校,但今日學校更加proud of me。」

撰文︰倪小珊

美術︰梁政敏

自爆會考「揸梯」 吳君如返母校勉勵師妹

君如與老公陳可辛和女兒陳是知在校內四圍參觀。(影片截圖)

自爆會考「揸梯」 吳君如返母校勉勵師妹

大師姐君如與一眾小師妹及老師合照留念。(影片截圖)