【聲明】港生活網站並無進行電話推廣活動

懷孕7個月被寵上天 梁諾妍爆洪永城勁囉唆

發佈時間: 2021/10/11

現時懷有約七個月身孕的梁諾妍(Inez),在懷孕初期與余曉彤(Hidy)出海拍攝香港開電視新節目《碧波遊浪記》,準爸爸洪永城(Tony)對愛妻腹大便便仍堅持外出工作,表現得相當緊張,就連Inez亦忍不住大爆老公愈來愈囉唆,認真搞笑;Inez亦計劃順產生B,並修讀產前產後的運動訓練課程,為分娩做好準備,果然是細心好媽媽。

梁諾妍拍攝《碧波遊浪記》時,剛懷有兩個多月身孕,在一個月的拍攝過程中,每天都跟隨攝製隊出海,遊走香港各個水域;除了遊覽秘境,節目亦見證余曉彤如何考船牌、學維修,由零開始到擁有一艘遊艇,與觀眾一同體會「養遊艇」的樂趣。雖然挺住孕肚開工,但Inez慶幸全程無任何不適,「好彩無暈船浪,只係中途有少少想恰眼瞓,所以未埋位時就恰一恰,瞓醒一覺就精神晒。」

開班指導媽媽學生

Inez與老公洪永城是新手爸媽,懷有第一胎自然相當緊張,Tony更將太太捧在手掌心,事事體貼入微。Inez大爆︰「每次我出去拍嘢,Tony就會話玩得開心啲,不過其實佢係好緊張,例如我拎住好多嘢,但又落緊雨,佢就會一輪嘴話『你點出去呀?小心跣親呀,使唔使幫你call車?』,但其實我由懷孕到依家,除咗第七個禮拜其中三日有少少想反胃,之後都無妊娠反應,好多嘢都係我自己做。不過老公依家開始比較囉唆,每次經過斜路,佢都會話『你以後行呢條路時要扶住欄桿,我上次行呢條路爭啲跣親』,我心諗,你自己論盡,又拉埋我嚟講!」

預產期在12月25日的Inez,透露會順產生B,她笑言︰「我覺得人一世物一世,好多嘢都要試,老公都好贊成,同埋佢呢個大膽仔應該會入產房,想經歷呢個過程,如果佢想剪臍帶,我絕對唔介意,不過佢唔鍾意都唔緊要,我無乜所謂。」兩公婆就和普通準爸媽一樣,買定不少懷孕天書做資料搜集,Inez更索性修讀這方面的課程︰「我讀咗產前產後嘅運動訓練課程,因為上網太多資料,唔會知道呢啲動作係咪啱孕婦,讀完之後先知生育時要用咩力,要用邊度肌肉。」已修畢有關課程的Inez,已經可以開班授徒,她表示︰「之前一直好多朋友問我,究竟有咗BB可以做咩運動,但如果連我自己都唔夠知識,我教佢哋又會好婦孺。依家讀完就可以同佢哋分享,我都諗住招收媽媽學生,希望幫到佢哋。」

余曉彤重提學校被燒落淚

至於在屢敗屢戰下考到船牌的Hidy,直言這次跟Inez主持節目是緣份,又分享拍攝期間的趣事,「海上真係好危險,天氣變幻莫測,你永遠唔知道下一秒會發生咩事,所以好新奇同刺激。最深刻一次係我哋夜航,黑麻麻乜都睇唔到,我哋仲半夜四點釣墨魚,釣到仲即刻韓燒,跟住就睇日出,真係好熱血。」Inez亦興奮表示︰「係我人生中見過最靚嘅日出,同你喺山上睇係兩回事,本來已經好攰,但愈望愈精神,眼都唔想眨。」

此外,Hidy在節目中分享自己創辦兩年的潛水學校,去年九月因遭雷電擊中而發生大火,短短十五分鐘將Hidy的心血燒得一乾二淨。她在鏡頭前曬淚說:「好似發夢咁,傷心咗三日,淨係喊,當時清理現場嘅味道同畫面,到依家仲記得。直至有朋友同我講,雖然潛水學校燒咗,但我所有嘅技術、經驗,仍然留喺自己度,無人可以取代,嗰刻我先諗通咗。」

場地︰THE WAVE

服裝: ZARA(梁諾妍)

髮型及化粧︰Inez Leong (梁諾妍)

、NC MAKE UP(余曉彤)

攝影︰Alma

撰文︰倪小珊

美術︰梁政敏

懷孕7個月被寵上天 梁諾妍爆洪永城勁囉唆

余曉彤佩服梁諾妍懷孕仍可輕鬆完成節目。

懷孕7個月被寵上天 梁諾妍爆洪永城勁囉唆

梁諾妍爆余曉彤首次駕駛遊艇時像玩「碰碰車」,令她嚇破膽。

懷孕7個月被寵上天 梁諾妍爆洪永城勁囉唆

洪永城與梁諾妍興奮期待二人的愛情結晶品來臨。(資料圖片)