做手術除膿｜寶珮如拍劇突然面癱憂中風 全身麻醉留陰影：好驚醒唔番

前亞視藝員寶珮如（Baby）近年再次活躍幕前，電影有《藍天白雲》及《濁水漂流》，電視有《愛回家》、《大步走》、《換命真相》及《痞子殿下》，甚至好友楊紹鴻新一輯電台節目《一起走過》也找她做拍檔。當看似一切變得順利之際，Baby要面對人生又一次的手術，事緣1999年車禍後毀容破相，臉上有塊鈦金屬片及鑲滿了螺絲，可是多次鼻竇及傷風感冒，有些膿積藏在裏面，搞到三叉神經而面癱，令她一度以為自己中風，更很擔心這次全身麻醉的手術，驚自己不能甦醒過來。

{{hket:ul-video id="4383"}}{{/hket:ul-video}}

{{hket:inline-image name="SKP08562.jpg"}}{{/hket:inline-image}}

{{hket:inline-image name="babybohkartist_225714041_850044359051020_6583336797320998359_n.jpg"}}{{/hket:inline-image}}

Baby這日接受《晴報》專訪時已完成手術，見她相當精靈及對答如流，只是久不久要暫停拍攝，讓她抹走從鼻孔流出的污穢鼻血。Baby話：「其實鼻竇炎唔係一朝一夕嘅事，醫生話我係發咗霉嘅鼻竇，聽到好似好恐怖，佢話我之前好多次同埋傷風感冒，啲膿走唔到，因為（車禍手術後）我裏面有塊鈦金屬片，鑲晒螺絲喺下面，有少少細菌感染就會藏喺入面，結果搞到三叉神經有面癱。所以自己好著緊去睇醫生，現在做咗手術，一切都安好。發覺人生原來健康好重要，體會到『病向淺中醫』，但係『淺』唔係講Money嘅『錢』，最小問題時要快啲去根治同知道來源，唔使搞到好似我而家咁。（今次手術順利？）醫生話只係順利，要6個星期後先知道過程是否成功，因為我而家個鼻甲下頜骨鑿了兩個窿，呢兩個窿係畀我鈦金屬片壓住嘅鼻竇位置，將啲膿同邋遢嘢可以排出嚟，所以而家耐唔耐會突然間流鼻血，呢啲係正常反應。我求主耶穌保守，希望會冇事，大步檻過，多謝你哋關心。」

《一起走過》10月回歸｜寶珮如接江美儀捧做新一輯主持 楊紹鴻碌爆人情卡 講明見好就收【下一頁】

據知她完成《痞子殿下》所有拍攝後，才入醫院接受這次手術，可見Baby做事有計劃及交帶，「其實我早兩個月前見醫生，嗰時面癱好緊急，我以為自己中風，因為一路拍戲時塊臉冇知覺，眼冇知覺，下臉冇知覺，刷牙食嘢都冇知覺，以為腦入面爆咗一條（血管），即刻去照電腦掃瞄同超聲波等等，發現原來鼻竇炎腫脹而壓住三叉神經…，醫生叫我即刻做手術，我吓了一聲出來，話我現在正拍緊古裝劇唔可以做手術，我話要開到8月尾、9月頭，他說可以畀我拖住，於是開藥畀我冇咁辛苦。其實點解要拍完先做，係因為手術後會有啲嘢流出嚟，我而家鼻裏面有好大舊棉花，係我諗唔到可以藏咁大舊嘢喺入面，呢舊棉花係會自行溶解，以微創手術藏咗入去就唔攞走，但溶解過程中會血同邋遢嘢流出嚟，若果開工時就好唔雅觀，所以知道劇集拍到幾時，就同醫院及醫生配合，所以前兩個禮拜做完這個手術。」

Baby回憶手術前後的心路歷程時，說出來看似平淡，其實心中也有過不少憂慮，「我做呢個手術好驚唔成功，因為要全身麻醉，做2至3個鐘頭，聽到好似幾嚴重，我係好怕全身麻醉，好驚會醒唔番…，當然99年撞車做過5、6次以上全身麻醉，每一次麻醉完我嘅腦細胞都有受影響，人嘅記憶，好多嘢唔係好集中到精神。醫生就話風險唔大，反而老公係比較緊張派，佢係好認真嘅人，又好錫我，成日話今次係咪太辛苦，因為開古裝劇係幾辛苦，每日預3個鐘頭化妝及有好多群戲，每日要03、04，半夜就要化妝，廠景又拍通宵，間斷日日咁樣開工，老公就問我係咪太辛苦，叫我唔好再拍劇，但我就解釋係古裝劇，始終時間上比較長少少。我對自己有信心，覺得上天對我不薄嘅，仲可以留畀我一口氣可以活到今日同做到鍾意嘅嘢，覺得耶穌會保守我，所以我同老公講唔使擔心，我覺得『我得嘅！』，呢啲擔心當我手術後醒番，唔知點解唔記得咗，我就係咁，係一個好開心嘅人，嗰一吓有緊張，有少少會擔心，而家又冇嘢，我希望唔好再做手街，覺得做手術唔係一件好事，始終要去經歷好多嘢，雖然呢刻口講好簡單畀大家聽，其實手術後鼻係好痛，好多唔好嘅嘢係無講畀大家聽，所以希望我唔好再做手術，希望可以開開心心過活埋呢度每一日、每一天、每一個小時、每一分鐘、每一秒，哈哈！」

夏天拍古裝│寶珮如拍《痞子殿下》捱壞身子 鼻竇細菌感染三叉神經導致面癱【下一頁】

對於22年前的交通意外，Baby坦言從中體會很多事情，很感恩做到自己喜歡的工作及認識到另一半，「當中過程係難過，好感恩認識到好多愛錫我嘅朋友，真正錫我嘅朋友原來唔多，佢哋可以同步同我去行我嘅苦路，我做手術等如佢哋做手術咁，大家好擔心我嘅財政，當時差唔多係借錢度日，好多手術費同生活費，而家一一捱過，要好多謝袁潔儀姐姐，佢係我最最最美麗嘅天使，唔知點講…，一世還不完，每食一口飯都會諗起佢；仲有大姐明（林建明）對我真係不離不棄，好感恩可以同佢合作，作為一個新人、細路女時候可以同佢合作到我出事時，佢好似阿媽咁照顧我，好多嘢去take care我。我可以活到今天，好多謝我身邊呢啲摰愛。」

（↓點擊放大睇圖片↓）

提到1988年參加亞視《第三屆未來偶像爭霸戰》而入行，Baby可說是《全民造星》及《聲夢傳奇》等人的大師姐，「而家同我哋以前一樣，都係經過選美或者歌唱比賽而入行，其實每個年代都無變，每一年有呢啲途徑畀新人去參加，繼而發掘佢哋出來。好似而家《全民造星》同《聲夢傳奇》，同我哋以前《未來偶像》一模一樣。覺得呢班年青人同我哋好不同，我哋以前比較鈍啲，身上冇咁多『刀』，而家做藝人真係要『周身刀張張利』，意思係要18項全能，要識做戲又要識跳舞，就連配音都要識。入行門檻係再高咗，好佩服呢班年輕小朋友，可能我哋食嘅奶粉係比較蠢啲，若果當年叫我搞咁多嘢，可能今日坐喺度嘅唔係寶珮如，唔知會變成邊個。」

撰文：梁榮達

場地提供：城景國際酒店

同場加映：Sick問識答｜子宮肌瘤易經痛恐致便秘腎積水 醫生拆解常見症狀+預防方法

{{hket:ul-video id="4369"}}{{/hket:ul-video}}

U Lifestyle App自家節目登錄《U TV》專區！

↓↓試玩、試食、試用影片任您睇↓↓

【立即體驗】