被評為最麻甩男藝人 馬國明鄭嘉穎直認不諱

無綫台慶劇《星空下的仁醫》將於下周一推出，鄭嘉穎、馬國明等昨日到荃灣出席宣傳活動。最近嘉穎與馬明在「鏡頭前幾高質，鏡頭後勁麻甩嘅TVB男藝員」的投票活動中，均榜上有名，馬明更被投選為榜首，兩人都直言並不介意，更自認有時很樣衰。

鄭嘉穎、馬國明等昨日出席《星空下的仁醫》宣傳活動，有份主演的鍾嘉欣雖正身處溫哥華，未能親身到場，但她亦有越洋拍片支持。而嘉穎在台上被問到做爸爸後的轉變，他表示過去缺乏與小朋友相處的機會，但當爸爸後訓練到耐性；羅子溢（前名羅仲謙）則取笑馬明已經扮演過十多次醫生，醫生才是他的「正職」，嘉穎不禁笑說︰「佢（今次）做婦科㗎。」

嘉穎催馬明生B

繼11年前的《鐵馬尋橋》後，嘉穎與馬明雙視帝再合作拍劇，大鬥演技，他們都大讚對方多年來沒甚麼改變，馬明表示︰「佢依家係緊張啲，要返屋企湊仔。」嘉穎則「回敬」說︰「遲啲你做咗老竇就明。（催佢快啲結婚生仔？）呢啲無得催，到時候就會嚟，佢都知自己唔細，做老竇就快喇。」馬明即尷尬道︰「到時候再話你知，你估好似大佬（嘉穎）咁銀根充裕咩！」

至於最近被評為最麻甩男藝人，嘉穎和馬明都坦言並不介意，被選為榜首的馬明笑謂︰「演員就係要有咁嘅特質，隨時可以好有型，但有時又可以好樣衰。」嘉穎亦直言︰「基本上我哋就係兩個麻甩佬，麻甩好正常。」

採訪︰ Pauline

美術︰梁政敏

攝影︰林良明