張松枝在無綫曾參演超過100套劇集，精湛演技，既正亦可邪，令人印象難忘，尤其是劇集《離島特警》的「沈天祐」、《茶是故鄉濃》的「榮耀祖」、《回到三國》的「趙雲」等等。自2012年離開服務了18年的無綫，他轉投其他平台拍劇、拍電影，可惜遇上疫情，即時手停口停，收入嚴重受影響，他慨嘆說：「唔做藝員，都幾難搵嘢做。」他表示幸好古天樂經常開戲，令大家有工開。
時光倒流至1983年，當年只有16歲的張松枝，與朋友在石澳耍樂時被星探發掘，他想也沒想就答應對方去試境，不擔心是騙局嗎﹖張松枝接受《晴報》專訪時笑說：「當時嘅資訊冇咁發達，嗰日我喺石澳見到有隊crew喺度，有晒攝影機，又有燈光師，所以冇咗警覺性，加上我好肯定係一間廣告公司拍緊嘢，當時嗰個人話『你幾好喎，有冇興趣拍廣告？』後來我就上咗間廣告公司試鏡，咁就入咗廣告界。」憑其俊朗的樣子，拍了過千個MV，更是寶麗金「碟聖」系列的御用男主角之一，故有「卡拉OK王子」稱號，張松枝開懷大笑，一臉自豪地說：「嗰陣時環境好吖嘛，卡拉OK興起，好需要我哋呢啲靚仔喺度嘅，我本身都有儲返啲帶、碟（MV），但係發晒霉，不過而家上網都搵到啦。」提到他曾與陳慧琳、金城武等一線歌手合作，他表示當時沒有特別趣事發生，拍完就收工。
張松枝新look激似「鷲哥」變型佬 為養家離巢感激好老婆全力支持【下一頁】
後來卡拉OK開始式微，適逢無綫開設經理人部門，張松枝獲無綫主動簽為旗下藝員，自此展開拍劇的生涯。本著嘗試的心態的張松枝，在頭半年未獲分派工作，他說：「之後公司叫我入訓練班（1994年第7期藝員訓練班），同期有陳展鵬、劉愷威、梁雪湄，當時我都未有壯志雄心呢樣嘢，只係諗住試吓，我記得第一日入訓練班，成個朝早都好悶，做乜要我哋睇《旺角卡門》呢，於是下晝我就走咗冇返去，無綫打嚟問我做乜走，我咪話有少少唔舒服，但第二日我都照返。」當時沒有打算放棄？「當時仲未識諗，有一個咁新鮮嘅地方，加上嗰陣時好多人都好想入TVB做演員，係一個榮耀，我都有少少咁嘅心態，既然入到去喇，咪盡力試吓囉！」
【25年情誼】藝訓班舊友聚會鍾潔怡罕有露面 劉愷威懶理楊冪緋聞風騷聚會【下一頁】
拍劇初期，張松枝獲分派飾演正直角色，例如《刑事偵緝檔案》、《鑑證實錄》，當中《離島特警》的「沈天祐」一角，更令觀眾留下深刻印象，他說：「而家仲有人叫我『天𧙗』，可能我喺嗰套劇入面，死得特別慘，呢套劇出咗之後，監製劉仕裕見到我做得幾好，於是搵我拍《茶是故鄉濃》，但叫我做反派，我又覺得幾特別喎，我一直都做好多正直嘅角色，突然之間叫我做反派，我都要做好多嘅功課，先至可以入戲。」
翻查資料，張松枝每年都有份參演很多劇集，不過在2012年，他有感事業沒有進展，於是決定離巢，「諗吓係咪有其他新發展，試下電影又好，或者內地劇又好，加上王維基開咗HKTV，試吓新公司、新製作，於是我就諗自己應唔應該走，其實都徵詢咗好多人嘅意見，屋企人同前輩都話，既然覺得喺度冇乜發展就出去試吓，唔得咪再返嚟囉，唔試吓，過多幾年可能會後悔，嗰陣時我又諗，正值結咗婚，又有小朋友，開支比較大，出去嘅人工可能會比較可以照顧到家庭，所以就選擇咗出去，離開TVB。」
《二月廿九》張松枝演技細膩有佬味網民激讚 綠葉王蛻變影圈型男無悔離巢【下一頁】
王維基當年不獲政府發牌，很多人都失去工作，張松枝坦言有一段時比較徬徨，但很快已轉投電影界和拍內地劇，不過這段日子，給他一個很大的磨練，看透了很多，「其實喺呢個世界上，唔係你話要，人哋就俾到你，好多掙扎位出現咗，耶穌話齋，呢度門閂咗，佢會開返度窗俾你，我都相信而家係咁樣，好彩，佢真係開度窗俾我，我喺另一方面發展。」沿住光明的道路走，過程十分順利，及後接拍ViuTV劇集《黑市》、《二月廿九》、《太平紋身店》，當中《二月廿九》的「辰叔」一角獲觀眾激讚。對於兩間電視台，張松枝說：「TVB有個既定程序，要變都唔會變得太多，但ViuTV嘅靈活性大，只要有新嘅嘢就會去試，無論劇集、綜藝節目，唔係一般電視台睇到嘅風格。」他指曾志偉現時擔任無綫高層，一定會有改革，將來的口味會迎合後生一輩。會否考慮返無?張松枝說：「好難講，老闆、高層都轉咗人，如果無綫仲用到我，大家咪一齊傾吓囉，睇吓大家嘅方向啱唔啱，啱咪合作，冇乜問題，但而家公司仲咁大，仲有咁多演員，仲需唔需要我哋呢班咁舊嘅演員呢?」
《中佬唔易做》 袁富華茶記打工嗌辛苦 張松枝Sell寬頻開爆單【下一頁】
受疫情影響，張松枝接洽的電視、電影的工作，很多都停頓下來，他只好靜待工作的來臨，「邊會估到兩年，而家好難去到兩年前嗰種蓬勃嘅環境，收入梗係有影響，盡量慳啲，而家始終仲有少少工作，客串性質嘅劇集，忍住先。」有否想過轉行？他一臉認真地說：「唔做藝員，都幾難搵嘢做，因為做咗咁多年，你想接觸番出面嘅工作，來來去去好似淨番保險、地產，咁就冇喇，可以做啲乜嘢呢？嗰陣時都有諗過，如果真係做唔到，我就去第二度做，返內地做演員，應該都仲可以，因為內地嘅需求都幾大，但始終我有個家庭，所以當初我冇行呢一步，留返喺香港，好彩有古天樂先生，多咗電影開，又有ViuTV劇集拍，仲可以生存到。」
場地提供：Harlan's (The ONE)
撰文：黃曉妍
攝影：王華婷、林君茹
U Lifestyle App自家節目登錄《U TV》專區！
↓↓試玩、試食、試用影片任您睇↓↓
【立即體驗】
同場加映：新派韓式素食嚐時令蔬果料理 秋日精緻下午茶健康時尚兼備