新劇扮吳偉豪媽媽 李佳芯︰現實中都生得出

李佳芯（Ali）昨日出席新劇《有種好男人》（暫名）記者會，Ali在劇中與吳偉豪演母子，後者的角色年齡是17歲，已數度演人母的Ali直言不需刻意扮老，因為自己現實中也可生出17歲的兒子，但演技上會適度調節，希望演得具說服力。

馬德鐘、李佳芯、陳自瑤及吳偉豪等，昨日出席無綫新劇《有種好男人》（暫名）記者會，劇中Ali有一個17歲的兒子，已數度演人母的Ali表示︰「現實中我都生得出，係合理同合法嘅，所以我都係做番自己，只係演技上要重新調節下，希望演得有說服力。」Ali又笑謂︰「第一次有咁大個仔！因為劇本未出晒，所以佢係咪我生、邊個生或者係領養都未知。」她直言不是第一次演人母，心情未受影響，但她指這是與「囝囝」吳偉豪首次合作，下月開工前會先互相了解。

陳自瑤強調身邊有好男人

至於馬德鐘將飾演保鏢，要員保護組（G4）出身的他表示︰「今次做番自己老本行，都有啲說服力，我諗無人會話我唔似；喺姿勢、眼神同隊形方面我都會做多啲功課，希望觀眾睇得過癮。（會否騷肌？）劇入面大把人會騷，我都會操，因為要應付好多動作戲。」

另外，同場的陳自瑤（YoYo）會飾演馬德鐘的姑姐，她笑言︰「今次輩分又高咗，起初聽到都打個突，我邊有資格做馬神（馬德鐘）姑姐呀？後尾知道只係輩份高，年紀細過佢嘅。」談到YoYo以「感情上好少遇到好男人」來形容新劇角色，問她現實中是否一樣？她急急澄清︰「梗係有（好男人），身邊大把，我只係跟稿讀啫。（角色會否性感上陣？）咁要監製加戲喎，做到我都盡量做，露胸、露腿、露腰咁啦。」

採訪：Pauline

攝影：林良明

美術︰梁政敏