【聲明】港生活網站並無進行電話推廣活動

冷飯減肥法

發佈時間: 2021/10/21

身為中國人,喺香港成長,大多數都「臭米氣」,呢3個字嘅解釋,指人食過米呢種糧食,聞起嚟就會有種糧食嘅氣味。米對中國人嚟講真係好重要,因為個個都想「有米」,個個都唔想「食塞米」。廣東話真係好勁,其中同米有關嘅俗語都真係好多。唔覺唔覺,原來平時都講咗好多同米有關嘅俗語同歇後語。有幾多呢?計下先︰

好多projects,我同人講嗰陣時都係非常雄心壯志,最後卻不了了之,其中原因就係心頭高,自以為係「大雞唔食細米」,結果就咁變成一煲「無米粥」!另一個原因,就係有好多傾談對象都係「豉油撈飯」,整色整水,咁點可能合作呢?至少我都未去到「鯪魚骨炒飯」,唔食餓死食又骾死嘅「食穀種」環境,咁寧願平平穩穩,每日可以食返啖「安樂茶飯」,仲未去到為「五斗米折腰」嘅地步,真係有啲運。

以上唔夠300字,都可以掟咗7個同米有關連嘅形容詞,勁呀!

其實無喇喇,今次做乜我拋咁多「米」呢?因為我幾日前睇咗一個日本電視節目講「冷飯減肥法」。原來有種叫回凝澱粉,指澱粉經過加熱、冷卻之後產生變化,呈現抗性澱粉狀態,好似放咗入雪櫃嘅米飯、烤熟後再放冷嘅麵包等,所以話減肥要食隔夜飯。雖然話飯冷卻後抗性澱粉含量會多咗,呢種澱粉唔會畀小腸吸收,進食後嘅總熱量會降低,但我係老式人,覺得有啖熱飯食係好幸福嘅事,食冷飯仲要無菜汁,好淒涼啫,我唔制!

其實我無日日食飯好耐,因為我食咗澱粉質成個人會好水腫,所以實行咗「高蛋白飲食」好耐喇,所以就算細我好多嘅朋友,你絕對可以走嚟同我講你食鹽多過我食米!

(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭