《星空下的仁醫》改戲路演陰沉醫生 馬國明劇透︰我為救人做好多踩界嘢

無綫台慶劇《星空下的仁醫》剛開播，三大主角馬國明（馬明）、鄭嘉穎及鍾嘉欣在劇中演活兒科醫生，劇集節奏明快兼有笑有淚。前晚馬明搶救杜燕歌失敗一幕，大曬視帝級演技，昨日他接受《晴報》訪問時，坦言對劇集播出不久已獲外界熱議，大感驚喜，並披露自己與嘉穎的角色反差大︰「今次嘉穎會熱血救人，我就陰沉耍手段。」兩位《鐵馬尋橋》兄弟將大鬥法。

《星》劇播出後引來劇迷熱議，除了逼真的手術場面獲高度評價，馬明、嘉穎這對《鐵馬尋橋》兄弟相隔11年再度合作，又有鍾嘉欣回歸擔正，全屬焦點所在。前晚第二集，「況醫生」馬明的恩師杜燕歌命危，可惜馬明出盡全力也搶救無效；面對恩師在身邊離世的無奈及悲痛，馬明演繹到位自然，盡見視帝功架。至於「鬍鬚醫生」嘉穎，則扮演一心醫好小朋友、懶理醫院既定規則的仁醫，配合其現實中兩孩之父的暖男形象，為沉重的醫療劇帶來輕鬆氣息，更有網民大讚嘉穎的演繹及造型有他十年前在《怒火街頭》中流氓律師「Law霸」的影子。

角色行歪路有苦衷

提到第二集已大曬演技，正忙拍新劇《隱形戰隊》的馬明，坦言暫未能抽時間重看自己的演出︰「無諗過呢齣劇極速有回響，相信大家會一路追落去。」他直認今次角色與過往扮演醫生大不同︰「我喺劇中初時有少少行歪路，唔似《On Call 36小時》『一件頭』咁年輕熱血，有佢陰沉嘅一面，不過都係一個好醫生。（好多場面與嘉穎嘈交？）我哋確實有好多對立位同誤會需要化解！」馬明指「況醫生」在海俊傑（海仔）招攬下，加盟對方的醫院︰「海仔職位比我高，威迫我做好多嘢，我個角色唔係好似嘉穎一樣咁熱血救人，反而要同高層玩好多辦公室政治，為咗拯救病人仲會耍手段，我要同海仔扭盡六壬，做好多踩界嘢！」他相信劇集初段與海仔的政治鬥爭場口，可令觀眾投入︰「海仔負責安排升職，佢因為忌才，寧願升易控制嘅周家怡都唔升我，呢啲係政治手段，大家留意我點保住自己，又幫病人謀福祉。」

視帝之爭隨遇而安

另外，提到馬明由99年至今，已第14次在無綫劇集飾演醫生，過往角色由古代大夫到心臟科名醫都有，被網民稱為無綫首席「御用醫生」。馬明笑言，嚴格來說自己只扮過四、五次醫生︰「好似《On Call 36小時》系列、《白色強人》、《心理追兇Mind Hunter》及《星空下的仁醫》咁，主角係醫生，其他劇就戲份唔多，都係醫生甲乙丙。（網民熱捧你同嘉穎爭視帝？）其實仲有其他劇未出，之前有啲作品都大回響，自己對視帝無乜強求，隨遇而安。」

撰文︰Steven

美術︰梁政敏