離世一年｜林子博發長文悼念亡妻董燕君 「呢一日係我人生最痛苦…」

前無綫主播林子博太太董燕君（Shirley）今日（21日）離世一年，身處英國的子博在facebook發長文悼念亡妻，字裡行間充滿無盡思念，並隔空送上自己主唱的歌曲《枕邊》MV，當中歌詞相當傷感，「如今枕邊的你，我已找不到……床的一邊如今消失了你的溫暖，剩我面對漸遠的光線……幾多個流淚著的夜晚，嘗盡患難，時光一去不返……約定千年後枕邊再遇到」。

{{hket:inline-image name="10211001.jpg"}}{{/hket:inline-image}}

{{hket:inline-image name="120672923_2752670011643083_163069454672238952_n.jpg"}}{{/hket:inline-image}}

同場加映：【娛樂直擊】李佳芯開新劇竟然有個17歲仔？ 吳偉豪執二攤頂替黃奕斌演出

{{hket:ul-video id="4421"}}{{/hket:ul-video}}

林子博太太董燕君（Shirley）於2019年患上罕見癌症平滑肌肉瘤的第四期，曾接受化療及標靶治療，可惜去年不敵病魔離世，令人感到婉惜。子博哭別亡妻之後，今年帶同一對子女移民英國，實踐對Shirley的承諾，好好培養子女成才。今日是Shirley離世一年，子博在facebook發長文悼念亡妻，呻內心積壓了不少負能量，就算講出來也被人誤會是抽老婆水，他寫上：「老婆，今日係你離開我剛剛一年。過去我哋面對嘅所有嘢，諗返轉頭呢啲過程都有窒息嘅感覺！我鬼唔知搵朋友傾可以減壓咩？但冇咩都唔好『放負』俾啲Friends啦！但係谷谷埋埋自己又唔舒服喎，所以傳媒朋友主動問我，就變成唯一可以釋放我體內瘀血嘅途徑！但原來呢個方法係唔Work㗎！會俾人鬧我抽死鬼老婆水（係呀！即係你囉！）咁我就唯有喺自己社交平台Tag你個Facebook宣洩吓，話你知我哋而家嘅生活過成點？（唔知得唔得㗎？但都希望你會睇到啦！）不過，有時又避免唔到關心我哋嘅媒體朋友，會轉載我社交平台啲Post報道出嚟！唉！所以最終都係又俾人鬧！」

林子博一對子女獲英國學校錄取 爆姊弟齊發燒 憂心確診【下一頁】

子博之後隔空對Shirley道出心底話，「老婆，你知唔知我而家已經變成喺自己社交平台，自言自語咁同你傾計嘅自由都冇！你就好啦！合埋眼乜都唔知走咗去，留返我一個人，帶住對子女繼續捱世界！話你知，你走咗呢一年，竟然有親戚夠膽死叫我搵返個人？黐線咩！我連諗都唔敢諗呀？前世未俾人鬧過咩？不過如果你報夢嚟鬧吓我又唔拘喎！原來冇得再聽你鬧吓，間房會好靜！老婆，你可以放心！我頂得住喎！你不嬲都知我硬淨嘅！望住屋企嗰兩隻大寶貝，就會變得冇嘢可以難到我！你成日話自己以前細個好想去外國讀書，而家你對子女做到喇！我肯定你會當自己做到一樣。最後，我想講嘅係：你知唔知我好怕面對10月21日？因為呢一日，係我人生最痛苦嘅日子。老婆，你究竟生前俾咗啲乜嘢我食？都成一年啦！點解我仲會咁掛住你嘅？我真係有好多好多嘢想同你講，呢首歌（指歌曲《枕邊》）係我過去一年嘅心聲，希望你喺上面可以聽到啦！愛你！」

（↓點擊放大睇圖片↓）

不少網民睇完長文後留言安慰和鼓勵子博，「總有人喜歡與不喜歡你，毋須太在意別人的評價，他們給你0分或100分又如何？為自己而活、為愛你及你愛的人而好好地活已經足夠了！加油」、「加油，好好照顧自己注意身心健康。人係要適當釋放情緒的，千祈唔好因為別人的『睇法』就抑壓自己。你仲有一對寶貝兒女，佢哋需要你，亦係你的動力來源！加油，一切都會越來越好的」、「子博，你已完成太太心願移民到另一個地方生活，為子女繼續向前望，遇到唔開心嘅你就唱歌畀我哋聽吖，唔好鬱埋喺心裡面，我哋願意做你聆聽者，加油呀」及「你老婆一定收到你心意！加油努力生活」等等。

撰文：梁榮達

U Lifestyle App自家節目登錄《U TV》專區！

↓↓試玩、試食、試用影片任您睇↓↓

【立即體驗】