婚宴金牌司儀｜林盛斌遇醉酒外父全場靜過太空 一句化解尷尬親友大笑拍爛手掌

呢兩年來唔少情侶都因為疫情而令婚期一推再推，近日疫情有緩和跡象，唔少新人都陸續開始辦婚宴。日前鄭中基就喺社交平台出post，徵集大家見到嘅婚宴奇觀，佢留言：「近排見好多人結婚，諗起之前睇過有啲MC講錯嘢，定係奶奶外母著錯衫，其實搞結婚都應該幾多大鑊嘢，睇吓你哋又有冇啲咩故事開心share啦！」仲hash tag「一人一個結婚之匪夷所思」，又提起佢之前參演電影《我要做Model》中嘅一幕，話「即場拆人情」應該已經好少事！

{{hket:inline-image name="33785589_226383974836062_6913811531582930944_n.jpg"}}{{/hket:inline-image}}

果然，好快就引到過二千人留言，其中最爆嘅一個莫過於金牌婚宴司儀林盛斌（Bob）分享嘅故事：「七八年前試過有一次，個外父飲大咗，去到婚宴尾段突然上台攞咗我支咪，然後指住台下面個新郎哥講：『你呀，記住對我個囡好啲呀，如果唔係，我X爆你XX㗎！』之後全場靜晒，最正嘅係，新郎嗰個阿媽，即係奶奶，都坐咗喺主家席嗰度食緊個伊麵，然後我就攞返支咪話：『外父，放心啦，為咗保護屋企人，我相信佢一定會對你個囡好好㗎，同埋奶奶都70幾歲啦，不如就咁算啦！』跟住全場大笑兼拍手掌，最緊要嘅係奶奶都企左起身拍晒手！」

唔少網民都留言大讚Bob好有急才，成功化解咗一對新人婚後嘅第一場「風波」，仲話一世人結一次婚，畀多少少錢請個識執生嘅司儀都真係抵！又有人建議Bob可以出番個婚宴笑話系列放喺YouTube，轉型做「婚宴KOL」。

仲有其他網民都留意拋出精彩故事，都係睇到人眼都突：「見過女家多左人黎話要加枱，男方話唔加，跟住個外母拉成班親戚走，新娘追到去門口坐喺度喊；又見過前度衝上台拎咪話：『以前你話娶我時點點點，現在你都要咁對你老婆，唔好再叫人落仔，有就好生啦！』全場靜左。」

圖片來源：Instagram