接受姊弟戀 20歲ANSONBEAN揀女友唔要辣妹

樂壇新人陳毅燊（ANSONBEAN）最近推出新歌《you made my day》，歌曲MV以「女友視覺」形式拍攝，令一眾「豆粉（粉絲）」心心眼。00後的ANSONBEAN自稱拍過2.5次拖，目前單身的他笑言接受與姐姐談戀愛，但竟自爆有一個奇怪的擇偶條件。

ANSONBEAN去年在《全民造星III》奪季軍後，其出色舞技及可愛笑容吸納大批「豆粉」，他早前在新歌《you made my day》MV中，大玩從女友視覺出發的拍拖甜蜜畫面，令粉絲不停loop。提到現實中曾經歷的拍拖畫面，ANSONBEAN自言在前度心中屬於笨拙類型，「或者可以話我論盡，因為我成日整爛嘢，又唔記得重要日子，例如拍拖紀念日。」他坦言自己最長的一段戀情，也只維持十個月，所以從未經歷拍拖周年，「我拍過2.5次拖，點解有0.5次？因為當時我以為同嗰個女仔係男女朋友，但原來對方一直都唔覺得係拍拖。」

自爆拍拖2.5次

出道短短一年，ANSONBEAN的工作排山倒海，他直言根本無時間拍拖。提到擇偶條件，他笑笑口表示︰「隨緣啦，始終要睇性格夾唔夾，相處係咪融洽，不過女朋友最好唔食辣，因為我自己都唔食得辣。（如果對方係辣妹呢？）咁就唔好喇！」年紀輕輕的他又搞笑說：「我本身唔鍾意鬧交，以前拍拖都問過女朋友點解無試過鬧交，仲講笑話不如試下。」他揚言不抗拒姊弟戀：「當然年紀唔好相差太遠，對方大我五年都接受。」

ANSONBEAN正忙拍ViuTV新劇《i.SWIM》，自認論盡的他練水時經常受傷，「劇中我主要游自由式，我成日跳落水都撞親個頭。」雖然他中學時已懂得游蝶、背、蛙、自四式，亦曾參加游泳比賽，但原來小時候的他竟然怕水。「五、六歲嗰陣，有次喺大澳海灘愈游愈出，公公擔心我浸親，即刻拉番我上岸，期間我個頭浸咗入水，飲咗幾啖海水，自此就驚水，依家拍劇時個頭要浸落水都驚驚哋。」他表示後來被外婆送入游泳學校才能克服恐懼。

拍劇狂操變大隻

提到有份拍《i.SWIM》的呂爵安（Edan）曾自爆練水時體力透支而暈倒，ANSONBEAN坦言拍劇消耗大量體力，除了操練變大隻仔，亦要戒口，「因為我本身唔算好大隻，所以要戒油，但就狂食白飯、白烚肉同蔬菜，每日食足四餐，同埋做gym一個鐘；加上修腹嘅運動，希望身形更加靚。」

髮型：Alex So @The Attic

化粧：Jenny Shih

服裝：Sandro、Levi's

場地︰南海小館@香港海洋公園萬豪酒店

採訪：Pauline

美術：梁政敏