許廷鏗自組公司做老闆 吳業坤︰汲取多啲失敗經驗

「巨聲幫」出身的許廷鏗（Alfred）與吳業坤（坤哥），昨日於音樂會碰頭，兩人久未見面卻不忘互窒。對於Alfred最近自組公司，坤哥表示羨慕，但自己無意做老闆，更開玩笑說要汲取對方的失敗經驗，激得Alfred說︰「把口真係無好嘢。」

許廷鏗、吳業坤、林奕匡、泳兒等昨日出席《東華三院「E大調合奏團歲月如歌音樂會」》，Alfred和坤哥相隔一年再見面，他們都表示有久別重逢的感覺，坤哥鬼馬問Alfred︰「我棚牙點樣？」Alfred笑稱有進步空間，又指坤哥的眼大了、白髮多了，認真搞笑。

問Alfred與坤哥有否合作機會？坤哥笑謂想跟Alfred學洗牙，而Alfred則想跟坤哥學日文。至於近日剛成立自家公司的Alfred，直言忙得透不過氣，坤哥大表羨慕，又明言可向他介紹新人，但Alfred拒絕道︰「好多人都問我簽唔簽人，我建議等公司穩健啲先。」坤哥開玩笑稱︰「我都想學你咁，吸收多啲失敗經驗先。」Alfred聞言笑罵坤哥︰「乜你咁講嘢？識你咁耐，把口真係無好嘢。」

泳兒想聽粉絲示愛

提到胡鴻鈞（Hubert）將於下月底舉行演唱會，兩人都預祝Hubert演唱會大賣，有空的話會結伴捧場，但Alfred坦言最近正為《全民造星IV》擔任導師，檔期爆滿。

另外，同場的泳兒透露日前欣賞音樂會時，有熱心的fans為她找泊車位，令她相當感動；但泳兒略嫌fans低調，希望他們多作主動，她說︰「我啲fans比較內向，平時佢哋舉牌都只係放心口，又好少大嗌我個名，所以我好希望fans有一次會大嗌『我愛你』，可能要訓練下佢哋開聲先得。」

攝影：林良明

美術︰梁政敏

採訪︰Pauline