屈臣氏蒸餾水向運動員爸媽致敬 捐$20萬助殘疾健兒

黛安知道屈臣氏蒸餾水一直都好支持香港體育發展，聽公關姊妹講，噚日佢哋就向3位殘奧運動員嘅爸媽頒發咗「運動員的最強後盾」獎座，並捐贈$20萬支援殘疾運動員嘅地區發展，呢班默默喺背後付出嘅父母，亦分享咗唔少動人故事。

獲頒獎座嘅包括喺今屆東京殘奧勇奪銅牌嘅陳浩源媽媽、曾於國際硬地滾球屢獲殊榮嘅郭海瑩父母，以及2019香港硬地滾球學校聯賽冠軍張家棟嘅父母。

陳浩源話，因為媽媽無微不至嘅照顧，和樂觀積極嘅性格令佢可走出意外陰霾，當時陳媽媽同佢講︰「個天留返條命畀你，係想你企返起身，唔想你放棄自己，要珍惜上天賦予你嘅機會」，令佢如當頭棒喝。陳媽媽噚日就話，「大家都話我係浩源嘅神奇媽媽，其實佢係我嘅毅力小子。」佢哋嘅故事好勵志又感人，真係值得大家致敬。