張致恒形象負面校長拒大仔入學 感覺被歧視：我個仔就唔配讀書？

下個月就37歲嘅前BOYZ成員張致恒（Steven）前年原本打算拍住關智斌（Kenny）開騷，反應都非常熱烈，不過開騷前因為爆出一腳踏六船而被全城喪鬧賤男，令佢嘅演藝事業幾乎玩完，可以話係自己打爛一手好牌。

同場加映：張松枝16歲被捧為卡拉OK王子 感激古天樂幫助度過事業樽頸

{{hket:ul-video id="4453"}}{{/hket:ul-video}}

{{hket:inline-image name="169949721_447485993147524_5946497063193785211_n.jpg"}}{{/hket:inline-image}}

原先係女粉絲嘅區燕雯（雯雯）「排除萬難」同Steven一齊，二人結婚後搬到村屋養小動物，仲兩年抱兩，而雯雯一直力撐老公，本來都開始有輿論認為應該畀機會Steven，亦認為Steven為屋企改變咗好多，好多網民都好支持佢一家人。不過雯雯做全職媽媽再請工人姐姐，Steven一人嘅收入支撐屋企生活開支似乎捉襟見肘，之後更陸續爆出唔少藝人借過錢畀Steven，Steven爭落嘅街數逾40萬，其中爭債主馮鎵瀠（Naomi）$20,000，Naomi公開追數大半年，Steven終於喺上月拳賽前3日還錢。Steven除咗負心，仲多咗個拖數嘅負面標籤！

雯雯早前指因為唔想成為「新聞人物」決定刪除IG帳戶，不過近日佢都開番個新IG記錄佢一家嘅生活。拳賽後Steven獲得一筆可觀出場費，一家生活彷彿回復正常，Steven同雯雯不時喺社交平台交代一下近況。不過，今日Steven就喺IG講到因為自己嘅關係令到大仔天寶畀幼稚園學校拒絕入學！

Steven post出同大仔嘅溫韾合照，留言：「其實真係好嬲，雖然我曾經犯過好多錯，大家唔原諒我唔緊要，但係點解我同個仔去報名幼稚園要畀個校長歧視，難道我個仔就唔配讀書嗎？有一個咁樣嘅爸爸就唔可以喺呢個社會立足嗎？你作為一個幼稚園嘅校長講到自己唔會放過任何一個教小朋友嘅機會，就要講到明因為我嘅原因唔畀我個仔讀書機會嗎？邊間幼稚園我就唔講啦，費事話我影響佢名氣！」

網民對呢件事有唔同嘅意見，有人就認為辦學機構應該係有教無類，更何況稚子無辜，唔應該因為爸爸影響阿仔讀書機會；不過都有人認為學校嘅做法冇問題：「名校一定都會睇家長背景同職業啦，唔係歧視問題」、「如果你成日有負面新聞令到有記者喺學校等咪會影響到其他學生」、「自己連累個仔，仲要大大聲話人歧視」、「如果兩個小朋友資質相同，我係校長有得揀都揀個家境冇咁複雜嘅學生啦」。