張致恒爆校長歧視囝囝反被狂插 雯雯護夫：你哋全部都只係睇表面

張致恒（Steven）尋日（26日）喺社交平台發文，稱大仔張天寶報讀幼稚園時遭歧視，佢喺文中直斥校長︰「你作為一個幼稚園嘅校長，講到自己唔會放過任何一個教小朋友嘅機會，就要講到明因為我嘅原因，唔畀我個仔機會讀書嗎？」不過Steven就「公審」不成，輿論反而幾乎一面倒都係反鬧Steven唔「湊米氣」，覺得係佢嘅品行連累囝囝。

相關新聞：張致恒形象負面校長拒大仔入學 感覺被歧視：我個仔就唔配讀書？【下一頁】

{{hket:inline-image name="219822941_123186583342311_7395348842915989733_n.jpg"}}{{/hket:inline-image}}

Steven一直都冇回覆網民同傳媒，今日佢太太雯雯就喺社交平台接力撰長文，列出18點「護夫」，強調佢哋未有為兒子報讀名校，又指大家唔應該再糾結Steven做過嘅錯事，內容如下︰

1. 我個仔冇報任何名校。

2. 我個仔冇報任何喺九龍塘嘅學校 。

3. 我個仔係未做任何學校嘅面試。

4. 身教係好重要，但係我個仔爸爸唔係殺人犯，佢只係犯咗10個有9個男人會犯嘅錯，咁樣並唔代表佢個仔一樣會犯呢個錯。

5. 我個仔只有兩歲半，佢將來會係一個點樣嘅人冇人可以預知，所以冇人有資格去批評佢。

6. 如果一個小朋友連面試都未面，個校長就話唔收，咁樣會唔會太過有問題。

7. 我哋從來冇渴望過一定要入呢間學校，冇接觸過個小朋友就話唔收，我都唔會想我小朋友讀一間咁樣嘅學校。

8. 你哋全部都只係睇表面，只係喺度停留係一件2019年發生嘅事，而家都已經2021年，如果呢段時間你哋係有喺張致恒身邊同佢相處，兩年後嘅佢係一個點樣嘅人，你就有資格去講；但係如果你仲停留喺兩年前，不如你而家了解咗先去評論咁多嘢。

9. 我哋係窮，但係並唔代表我個小朋友冇資格去讀書。

10. 我係唔會畀任何一個機會有人可以去傷害我嘅小朋友。

11.我冇報任何私家，報嘅都係政府資助。

12.我哋冇話過我哋報人哋就一家要收，只係覺得點解一間學校連面試都未面就表明唔收一個學生。

13.我老公唔係要嘈，佢只係替自己小朋友不公平，喺自己平台抒發自己感受，如果真係要嘈開咗學校名喇。

14.我老公的確有用詞不當，帶出太多誤會。

15.希望大家唔好停留喺兩年前，向前望。

16.請成熟點，不要傷害一個兩歲嘅小朋友。

17.我老公係有還錢，只係需要嘅時間長啲，但從冇走數。

18.香港人係善良嘅，請對自己嘅說話負責任，唔好一個大人去傷害一個小朋友。

不過雯雯嘅辯解都冇令網民靜落嚟，更反駁指即使學校冇見過佢囝囝，事前睇過個人資料都可以拒絕佢入學，亦係正常做法：「佢係咪唔知咩叫screening reject（篩選拒絕），唔好話幫小朋友搵學校，佢自己有冇搵過工。」而佢當中一句「10個有9個男人會犯嘅錯」更係辣著唔少男網民：「十個男人九個會借錢唔還？十個男人九個會同前女友拍拍吓拖突然同第二個奉子成婚？十個男人九個會性上癮？十個男人九個滾我都認同嘅，但唔係個個都好似佢老公咁衰格。」

圖片來源：Instagram
撰文：黃蘊姿