李嘉欣開爆濾鏡驚變膠面蛇精 網民難以接受：天生麗質唔使美顏

李嘉欣一向有「大美人」之稱，十三年前嫁富商許晉亨，三年後以41歲之齡誕下囝囝Jayden。一子之母雖然已經51歲，一直養尊處優做少奶奶嘅佢美貌好似凍結咗喺十幾年前咁，一啲都唔識老！不過天生麗質又零死角嘅大美人日前就衰咗喺「假面濾鏡」手上，唔少網民睇到都直呼恐怖！

{{hket:inline-image name="242076872_109638084799686_3289468080818605403_n.jpg"}}{{/hket:inline-image}}

李嘉欣一向都活躍於社交平台，不時分享自己嘅生活同出活動靚相，有超過廿萬followers追蹤佢動向！李嘉欣有時仲會share自己嘅近鏡自拍，甚至係素顏都未驚過，皮膚吹彈立破！但李嘉欣日前喺車廂中自拍，明顯開爆濾鏡，塊面都變晒形，幾乎認佢唔到；除咗下巴仔篤死人V到離晒譜之外，就連皮膚都變得又膠又硬，大美人向鏡頭擺pose放電都救唔番！

片段一出好多網民都難以接受，幾乎一面倒叫李嘉欣唔好再用濾鏡，留言︰「嘩！勁膠！假爆」、「成隻蛇妖咁」、「太膠面，自然啲靚啲」、「天生麗質唔使美顏啦」、「filter太過火了」、「本身都好靚，用filter就多咗」等等；自自然然嘅大美人睇嚟先係最受網民歡迎，唔知佢會唔會聽取民意呢？

圖片來源：Instagram

撰文：黃蘊姿