周潤發被同一人捕獲7次影到黑面？ 舉機自拍：你成日擺我上網

周潤發（發哥）生活貼地又親民友善，香港真係冇咩邊個唔鍾意佢！除咗係一個巨星之外，發哥仲係「自拍界KOL」，由唔知幾時開始大家喺街上撞到發哥，都會上前搵佢自拍，而發哥認為帶到歡樂畀大家，自然來者不拒，仲會落手揸機，𠱁得fans們好歡喜！發哥除咗行山，又會去九龍城街市買餸，仲經常去大埔嘅熟食中心開餐，所以呢幾個地點嘅街坊都好「有福」！不過昨日一向好老脾嘅佢竟然影到黑面？到底發生咗乜嘢事先？

同場加映：【娛樂直擊】陳柏宇下月開紅館演唱會 囡囡Abi上台爭咪？

{{hket:ul-video id="4554"}}{{/hket:ul-video}}

{{hket:inline-image name="5.jpg"}}{{/hket:inline-image}}

近日，有網民喺自己社交平台上載巧遇發哥時影嘅合照。發哥一身黑色行山裝束，頸掛白毛巾，不過發哥呢張相竟然係罕有黑面！呢位網民留言：「今日10點約朋友大埔食嘢，我叫朋友揀食大埔邊間？佢話最深刻我喺『林記』見到發哥，所以就揀去食點心……點知一坐低竟然又見到發哥，即刻再去捕獵，發哥話：『你又嚟？你成日擺我上網喎！』我回應：『係呀！發哥你受歡迎嘛！我每次同你影相都好喜悦同開心！』發哥就拎起電話又同我合照了！」

呢位網友澄清發哥超nice並冇唔開心同黑面，只係鬼馬嘅發哥話「今次畀啲唔同款式嘅表情你」，仲話每次見到發哥都會緊張，咁到底偶遇發哥幾多次先可以儲到呢個「特別版表情包」呢？翻查呢位網民嘅社交平台，原來佢已經撞過發哥足足7次，真係恨死隔籬！有網民留言話同日都見到發哥孖黃日華、盧海鵬開餐，大讚佢哋一啲架子都冇；藝人黃建東同好多人開到口，羨慕表示︰「我行咗一世山都仲未撞到發哥……」機會真係可遇不可求！柳俊江可能都葡萄post主，搞笑留言：「發哥呢個表情，相信唔係演技嚟。」

同時亦有網民話唔想打擾發哥，「啲人排住隊要同發哥影相，人家食緊早餐，唔該畀佢食得安樂啲，我見到都覺得好煩！我見過佢好幾次，從來冇打擾佢。」其實之前的確有網民影到發哥木無表情，該位網民表示發哥同方中信一行人跑上山，於是佢衝上前講句「唔好意思」後，就喺側邊舉機同發哥自拍！事後呢名網民都話覺得阻住發哥呀！大家如果真係愛惜發哥，就要睇番場合再禮貌邀請佢合照喇！

圖片來源：Facebook

U Lifestyle App自家節目登錄《U TV》專區！
↓↓試玩、試食、試用影片任您睇↓↓
【立即體驗】

撰文：黃蘊姿