一起走過｜江美儀憶當年被鄭則仕粗口大鬧 要重拍《肥貓正傳》結局喊戲

江美儀日前接受港台《一起走過》的訪問，同主持人楊紹鴻、寶珮如分享入行多年點滴，回憶1997年從加拿大返港拍攝第一齣電視劇《肥貓正傳》，由於剛從模特兒界轉戰影視圈，難免不懂得拍攝時的走位及演出技巧，結果慘被男主角兼策劃的鄭則仕（Kent哥）以粗口問候，同時大結局哭別鮑姐（鮑起靜飾）的重頭戲，亦只有她需要重拍。

{{hket:inline-image name="11081006.jpg"}}{{/hket:inline-image}}

{{hket:inline-image name="11081004.jpg"}}{{/hket:inline-image}}

同場加映：曾志偉望無綫成為有人情味機構 「希望係不捨而唔係帶住怨氣走」

{{hket:ul-video id="4582"}}{{/hket:ul-video}}

江美儀指當年移民加拿大後感「搵食艱難」，決定回流返港賺錢，「當時諗住返嚟拍一套戲，搵啲錢返番過去，點知玩咗廿幾年。（第一齣劇遇上鄭則仕，不易捱？）我到今時今日都多謝佢，佢係我恩師，佢真係會鬧……有場戲佢係辛苦啲，講佢跌低再起身，你知佢身位，會好攰，我因為唔識就住拍外景時啲燈光，成日遮到佢臉光……嗰次佢真係鬧得好甘，我好想喊，但鬧我都冇用，我真係唔識嘛！跟住自己心諗『唔會畀佢再鬧我多一次』。以後見到佢就人未到，聲先到，一嗌我就話『到』，咁就搞掂咗佢，冇再鬧得咁緊要……係想話畀Kent哥聽我真係想學，真係有聽佢講。（鬧得有幾嚴重？）鬧到想匿埋喺車喊，鬧到性器官出晒嚟，姨媽姑姐都攞埋出嚟，娘親係第一個。（感到好hurt？）係！我嗰時拍廣告時係公主，拍電視就自己顧自己，要自己mark衫，又要就燈又要就人，所以初初係好唔慣。」

單對單｜江美儀恨做小女人自揭離婚真相 吳君祥曾聽閒言：覺得身分有距離【下一頁】

覺得演技是何時開竅？江美儀說：「覺得拍《肥貓》時已經開緊竅，係因為Kent哥有一場戲，係講貓媽（鮑姐）喺醫院死，嗰場戲個個勁喊，就連收音師同燈光師都喊，因為拍得好感人，大家都好滿意。突然過咗2、3日，Kent哥同我講，嗰場戲我要重拍，我話『吓，點解我要重拍？我喊到喎，有交足戲』，但佢話『係呀，嗰個係江美儀喊，唔係Connie姐姐（指戲中角色）喊喎！佢係一個社工，一年會見幾多呢啲場合？點解會喊得咁犀利？唔係Connie姐姐死媽媽，你喊到死阿媽喎』。聽完呢句我就『燈』一聲，嗰個感覺真係江美儀自己喊，嗰個唔係Connie姐姐！」

（↓點擊放大睇圖片↓）

江美儀坦言當年補拍了一個眼濕濕有眼淚，並不是勁傷心的鏡頭，亦開始明白到演戲是甚麼一回事。不過開竅還開竅，並不代表能夠純熟運用出來。她與Kent哥之後再合作《屋企有個肥大佬》、《肥貓正傳II》及《騷東坡》，指對方在拍攝過程中教曉她不少東西，她越來越明白對方的想法，知道做演員「睇一件事要立體化」，「好慶幸頭幾齣劇都有Kent哥喺度，佢直情好似一個老師咁，慢慢由初班、中班，一路咁帶住我行。所以同佢拍完，覺得自己袋咗好多嘢落袋。」

撰文：梁榮達

U Lifestyle App自家節目登錄《U TV》專區！

↓↓試玩、試食、試用影片任您睇↓↓

【立即體驗】