拍片整蠱師妹反被玩 胡鴻鈞讚炎明熹︰又叻又乖

胡鴻鈞（Hubert）、應智越（細貓）等昨午到旺角某酒店出席《U Beauty awards 2021》頒獎典禮。本月底開個唱的Hubert早前在其YouTube頻道拍片，欲整蠱炎明熹（Gigi）卻反被玩，昨午他大讚這位小師妹聰穎︰「估唔到佢可以玩番我，見到佢音樂上咁叻又咁乖，我真係自愧不如。」

胡鴻鈞在《U Beauty awards 2021》頒獎禮中贏得「人氣活力男藝人」獎項，他特意分享護膚心得，並表示現時為準備個唱，飲食少鹽少油後皮膚更好。提到Hubert日前拍片原欲整蠱炎明熹，竟反過來被玩變成受害者，Hubert直言︰「其實初時諗點整鬼佢都諗到頭爆，驚被人話我恰佢，估唔到佢玩番我轉頭。（Gigi演技好？）佢好好又好乖，好欣賞佢，無論音樂上、性格上我都自愧不如。」談及本月底的個唱，正積極備戰的Hubert透露有Gigi及鄭欣宜當嘉賓，至於舊老友許廷鏗呢？Hubert坦言嘉賓只得兩人，但歡迎其他圈中好友捧場。

應智越感恩有花邊新聞

另外，ERROR成員郭嘉駿（193）主持的節目《晚吹-戀講嘢》，日前有女嘉賓自爆曾被新晉創作男歌手狠飛，嫌疑人之一的應智越昨日稱︰「其實我喺韓國好長時間，返香港之後朋友主要都係中學同學，但本身讀理科多數係男仔，女性朋友主要係圈中人，好少圈外人。（好無辜？）都開心，要多謝193，難得我有花邊新聞，多咗人留意同討論我。」至於193接受本報訪問時也開腔為細貓澄清︰「佢都有因為呢件事搵我，但佢都開心多咗人留意佢，會摷番佢首歌嘅MV，睇下女主角係邊個，幫到人幾好吖。」

採訪︰Steven

美術︰梁政敏

攝影︰林良明