踏上彩虹橋︱葉翠翠19歲愛貓見證嫁人生仔 長壽「大公主」幫媽咪湊三個弟弟

現年40歲、《2005年度香港小姐競選》冠軍葉翠翠，2015年同建築師男友Raymond拉埋天窗，先後誕下3位「王子」，生活非常幸福美滿。2019年後翠翠已經好少喺熒光幕出現，轉型做KOL嘅佢非常成功，FB粉絲人數高達廿六萬。翠翠不時都會喺佢嘅社交平台分享一啲健康、生活、湊B同扮靚等tips，又會share三個可愛囝囝同愛貓嘅相處點滴，網民都勁like佢一家！不過今日翠翠就表示愛貓「大公主」過身嘅消息，睇到都覺得心噏。

{{hket:inline-image name="258845481_609183760324943_2014503350893155624_n.jpg"}}{{/hket:inline-image}}

翠翠今日post出同大公主嘅合照，相中翠翠眼紅紅好似喊過咁，佢留言：

「媽mi（媽咪）要跟你說再見了……好多謝你陪伴了我半生，我真係好唔捨得你嘅離開，這份情，我會一直一直埋藏在心中。在這19年裏，有你一直陪伴著我，經歷了高低起跌，顛沛流離，有多少個夜晚流著淚入睡，只有你一直陪伴在側。

以前我們的「家」，只有現在的床褥般大小，貓廁所就在床尾。好多謝你一直在我身旁行到今日。今天，同一個紫色的貓廁所仍然在媽mi的房間內，係因為今天的你已經老了，再不能行動自如，而你只會逗留在媽mi房間，所以把貓廁所放在睡房內，你知道我真的好愛你嗎？

在家沒有一晚你不在我身旁一起入睡一齊起床，在未來的日子我實在無辦法想像沒有你的陪伴會如何。我的生活將要改變了……自13歲開始，家裏便開始有毛孩相伴。由此時此刻，再沒有毛孩了。當年一時衝動把你們帶了回家，但係我堅守了一世的承諾，對你們不離不棄，照顧終老，我做到了。我不知道將來會不會一時衝動再養毛孩，但係我知道我已經好累了，我可能再沒有勇氣去養，因為一次又一次要經歷生老病死。去到彩虹橋要快啲搵返弟弟妹妹。

我永遠不會忘記曾經有隻小白貓在我的生命裏出現。再見。」

大公主陪伴媽咪出道，去到嫁人再誕下3位小王子，喺翠翠生命中佔非常重要嘅位置。其實大公主已經年屆19歲，貓貓界嚟講算係「長老」。喺今年1月嘅時候翠翠帶大公主去睇獸醫，當時已經發現大公主有第4期（末期）腎衰竭同心臟病，當時翠翠已有心理準備大公主陪伴佢嘅時間可能唔會太耐。翠翠當時表示會畀最好嘅治療大公主，但畢竟大公主年紀已經太大，佢亦唔會勉強，一切以大公主嘅快樂行先。

翠翠兩個大啲嘅囝囝都好錫大公主，當時二王子知道大公主病咗，就靜靜陪住佢，一個3歲未夠嘅小朋友經已如此懂性。而大公主都非常有靈性，知道兩位小王子錫佢，今年「接納」咗佢哋做小鏟屎官，令翠翠好感動！翠翠當時post咗小王子抱住大公主嘅相，留言：「大公主走到小王子身上，我真的沒有想過大公主會接受佢哋，小王子和小小王子都好開心好開心！」而小小王子仲係最黐身嘅一個，曾經自己「消失」去陪匿埋嘅大公主，翠翠形容：「小小王子自己一個去揾大公主，其實係日日……佢時時刻刻都話要揾大公主，大公主有個咁錫佢嘅小鏟屎官，成日互相陪住真係真係好幸福。大公主由細到大都好需要愛，係一隻好需要愛嘅小貓，好需要attention，有小小王子每分每秒嘅愛錫，真係好幸福。」

大公主年中時有番胃口，又擔當大家姐角色幫媽媽湊住三個細佬；大公主最後不敵病魔，相信佢貓生最後一段路有翠翠同3個弟弟愛錫都非常幸福！

圖片來源：INSTAGRAM