細仔肉緊陪睇《星空下的仁醫》結局 鄭嘉穎大讚︰TVB製作進步咗

無綫台慶劇《星空下的仁醫》前晚大結局，結尾溫馨又含蓄，以大團圓告終。「鬍鬚醫生」鄭嘉穎昨日在IG上載與細仔鄭承亮（Yannick）一齊睇大結局的合照，小Yannick睇得入神超可愛。對於劇集正評不絕，嘉穎接受《晴報》訪問時稱︰「呢齣劇無論畫面、燈光、拍攝手法、布景及道具都進步咗。」

《星空下的仁醫》收視雖未算突出，但口碑不絕，除了幾位主角，大奸角海俊傑、濫藥醫生羅子溢的演出獲好評，小演員的慘情喊戲亦贏盡掌聲。結局中，「況醫生」馬國明疑因見死不救而接受聆訊，最終由「鍾教授」龔慈恩的車cam片力證清白。另外，「Candice」張寶兒發現胞姊並非因鍾教授及況醫生做手術出錯而死，眾人解開心結，鍾教授亦鼓起勇氣再次走進手術室做類似手術，重現20年前與實習的況醫生、「鬍鬚醫生」鄭嘉穎一起做手術的情景，場面感人。

出賣Yannick煲劇萌樣

至於鄭嘉穎終於跟「Eman」鍾嘉欣有情人終成眷屬，結局十分窩心。鄭嘉穎與細仔Yannick父子檔煲大結局，他留言說：「今朝（昨日）已經有啲失落，唔知之後幾時先會再見到鬍鬚醫生呢？」不少網民亦大讚《星》劇是TVB近年難得零負評的佳作。相隔三年再拍無綫劇的嘉穎，接受本報訪問時開心說：「知道網上反應好好，我都好幸運，咁耐無返嚟拍劇，但遇到一個好角色。」他大讚TVB製作改善不少：「真係唔同咗，畫面、燈光、拍攝手法、布景、道具都係進步咗，令我好開心。最重要拍好劇畀觀眾，因為觀眾識得揀，唔好睇就唔會花時間睇，所以拍好質素嘅劇，先吸引到觀眾返嚟。」

遇好角色願再返娘家

提到TVB製作進步，會否打動他再接無綫劇？嘉穎卻斬釘截鐵說︰「無…可以話暫時無啦！始終never say never，咁啱有好劇本而我又有興趣嘅角色，下一齣幾時真係答你唔到。」提到劇中童星演出獲讚，會否考慮讓兩個囝囝做童星？這位慈父一口拒絕︰「唔得！大家已知道佢哋係我同Grace（陳凱琳）嘅仔，我唔想佢哋有特別待遇，只想佢哋平凡成長，我平日會帶佢哋去公園玩，老婆會帶佢哋坐電車同地鐵，想佢哋做普通小朋友。」工作方面，嘉穎坦言仔細老婆嫩，一定要未雨綢繆，即使不捨家人，明年也可能返內地工作搵真銀，「你試諗下，我咁嘅年紀，我老婆咁細，我啲細路咁細，係咪要留多啲畀佢哋先？係一個負責任男人應該做嘅事。」

撰文︰Steven

美術︰梁政敏