【聲明】港生活網站並無進行電話推廣活動

呼籲男士放膽示愛 單身李佳芯︰未試過主動追人

發佈時間: 2021/11/26

李佳芯(Ali)早前與「蟲草大王」陳恩德(Mark)在酒店密會而傳出緋聞,但Ali澄清跟對方只是洽談合作,並非男女朋友關係。昨日Ali到又一城出席聖誕亮燈活動,明天39歲生日的她,坦言願望是告別單身,並呼籲喜歡她的男士大膽表白。

李佳芯昨日身穿一襲紅色長裙亮相,明艷照人。聖誕將至,但Ali因要拍攝新劇《有種好男人》,故要在工作中度佳節;而明天39歲牛一的她,透露亦要在拍劇中度過,她稱︰「有諗過度期放假,但到時無人陪我食飯仲傷心。(「蟲草大王」無約你?)佢唔係成日約我,嗰次我哋只係傾慈善活動,大家出年就會知,我哋私底下無乜見面。」

工作中度過生日

Ali坦言被緋聞報道嚇倒,擔心每次出街都被拍到,幸好自己較深閨,也不常去派對,故不會經常被偷拍。問她是否擔心緋聞嚇怕追求者?Ali笑謂︰「真愛係唔會逃避嘅,哈哈!不過做藝人的確難識朋友,所以要學識保護自己,例如盡量去公眾場所見面,或者叫助手、經理人一齊去,盡量行得正企得正,避免嫌疑,但如果人哋要寫都無辨法。」

Ali又指自己從未主動追求男生,若有男士想追求自己,應該放膽主動出擊,她表示︰「我覺得男仔係要大膽啲同主動啲,我就未試過追男仔。」至於聖誕願望是否希望明年聖誕有男友陪伴?Ali直言︰「要等到出年咁耐?都想嘅,但唔係有定無,係中唔中嗰個感覺,我唔介意等,搵個人陪有幾難?但唔會求其搵,等下先啦!(有追求者?)無送花呢啲咁熱烈追求嘅人,可能有人鍾意,但唔敢追啩!」

採訪、美術︰梁政敏

攝影︰倪小珊

呼籲男士放膽示愛 單身李佳芯︰未試過主動追人

Ali親手裝飾聖誕花環,手勢十分純熟。