開網上新碟首唱會 容祖兒完騷孖蔡卓妍合體開Live

闊別五年，容祖兒早前推出全新廣東專輯《薛丁格的貓》，前晚更舉行一小時的網上新碟首唱會，期間不但唱盡碟內全部歌曲，更轉了四個造型，誠意十足。騷後祖兒開IG直播，獲好姊妹蔡卓妍（阿Sa）擔任客席主持，令粉絲大感驚喜。

對於舉行是次首唱會及推出專輯，容祖兒大感滿足︰「呢張唱片每一首歌都記載咗好多我心裏面想講嘅嘢，如果你叫我去講好多大道理，其實我真係唔係好識，好多時候都係憑直覺諗到就做，所以我比較鍾意唱歌，因為唱歌可以抒發我嘅感覺。」

僅一小時的首唱會誠意十足，祖兒不但獻唱新碟所有歌曲，更換了四個造型。首唱會尾段更有祖兒綵排歌曲《明天見》的片段，只見她邊唱邊哭，場面感動，她解釋︰「因為疫情關係，我同屋企人、好朋友、同事或者歌迷，都未必能夠好似以前咁成日見面，但係我好相信我哋好快可以明天見，亦都好希望再見面嘅時候，我哋可以更好。」

飲酒面紅紅做直播

首唱會完結後，祖兒在IG開直播，蔡卓妍更為她任客席主持，但由於阿Sa沒有化粧，全程只聞其聲，但她不時儼如導演般為祖兒整理頭髮，非常貼心。而祖兒做直播時似乎面紅紅，有網民問她是否喝了酒，祖兒直言︰「有咁覺咩？飲咗好少啫，開心吖嘛。因為想做呢個演出好耐，隻碟又做咗好耐，好開心可以做個show畀大家聽。」談到新碟中最喜歡的歌曲時，祖兒認為只選一首很可惜，「每一首歌裏面都有好多感情，每一首歌都好值得畀心機去鍾意，每一首歌都有唔同意思。」

撰文︰Pauline

美術︰梁政敏