鄧梓峰攝影師大女罕有出活動 靚女有台型似High fashion模特兒

現年61歲嘅鄧梓峰（十郎）經常擔任綜藝節目司儀，有豐富工作經驗，形象正面嘅佢十分親切有親和力，深得觀眾喜愛。而且仲「周身刀」，精通彈低音吉他、詠春；又喺2000年考得小型飛機駕駛執照，擁有逾一千小時飛行經驗，為香港飛行協會會員及香港航空青年團上尉；在語言方面，他能操流利嘅德語同基本法語，又考獲筆跡分析證書同數個潛水牌照，非常厲害。不經不覺十郎已經入行30年，呢30年嚟都效力TVB嘅佢今日獲頒長期服務獎。

同場加映：東張西望│吳幸美天不怕地不怕成正義Icon 孝順女憶喪父灑淚：佢以我為榮

{{hket:ul-video id="4741"}}{{/hket:ul-video}}

{{hket:inline-image name="14.jpeg"}}{{/hket:inline-image}}

鄧梓峰接受訪問時話覺得眨下眼就30年，「感觸就係啲時間快到不得了，咁就30年？都係好事嚟，因為時間過得快其實係（代表）開心嘅。演藝界有個好有趣嘅地方，好似實驗室咁，我嚟到可以試好多唔同嘅嘢，演戲、配音……乜都可以試，其實我覺得仲有好多空間可以試，譬如舞台劇啦！音樂劇啦！」十郎多年嚟都冇過檔，笑言因為冇人搵佢，「所以我覺得自己喺市場上到底有冇需求呢？咁多年嚟盡心做好每一個派畀我嘅工作囉，呢個係我一直以嚟工作上嘅信念。」同時指自己唔係長期爆show，身為大前輩嘅佢仍然希望自己進步，「有啲空餘時間會增值下自己，學多啲嘢啦！」

鄧梓峰入行兩年就同老婆拉埋天窗，育有四名子女，不過十郎就好少公開佢嘅家庭照，而大女鄧瓊芝（Natalie）如今已經27歲亭亭玉立，自2017年大學畢業後，就開始從事攝影師工作，如今亦係時裝雜誌嘅全職攝影師。

日前Natalie激罕出席落選港姐代蓮曦丹美（Daisy）個人珠寶品牌活動，穿上一件Deep V黑色珠片連身裙現身嘅佢非常有台型，似足high fashion模特兒！Natalie平日影人、影時裝和影裝修比較多，亦有影自己，佢話屋企人中只影過爸爸鄧梓峰，因為對方好鍾意畀人影。身為星二代嘅Natalie條件優厚，但佢就話自己無諗過入演藝圈，不過因為鍾意時裝，加上覺得做模特兒感覺良好，所以呢日就唔介意試做一日模特兒。  

講到大女近日做model非常有壓台感，鄧梓峰就話阿女冇興趣入行，「佢本身係攝影師嚟嘅，我諗佢係客串一下，佢自己真係一手一腳去做攝影師呢樣嘢，同埋都好投入，我好開心見到佢有啲成績，有啲客人搵佢影相；又會幫啲牌子、時裝影相，替佢開心。但佢就對我呢個行業冇乜嘢興趣，個個人興趣唔同啦！」佢又話阿女最主力、最鍾意影fashion嘢，「但阿女好少影我，我叫過佢好多次，咁佢梗係有啲藉口，話唔得住、遲啲先（係咪收得好貴呀阿女？）可能係！可能我畀得唔夠！」十郎欣慰表示幾個仔女都已經出身，「呢段時間可以畀番多啲空間自己同太太，始終咁多年都花咗好多時間照顧佢哋。」

{{hket:inline-image name="1234444.jpeg"}}{{/hket:inline-image}}

{{hket:inline-image name="W3.jpeg"}}{{/hket:inline-image}}

{{hket:inline-image name="12344.jpeg"}}{{/hket:inline-image}}

U Lifestyle App自家節目登錄《U TV》專區！
↓↓試玩、試食、試用影片任您睇↓↓
【立即體驗】